Sen anentsüba anema Nov 28 nü linük tesem ajaklen longkak aittsü

New Delhi, November 23 (Agencies): Sorkari sen 500 aser 1,000 notes anentsüba sülen nüburtem sen agi kanga anünga bank nung tarensena nokdaktepa timtem ajangshiba atema aria bilemtsüba temaitsü sayua Bodhbar anepdang opposition MP 200-i Parliament kima tarensen ka yanglua nokdaka liasü.
Opposition party temisa, parnoki taruba Hombarnü (November 28) linük tesem ajaklen longkak aittsü, ta metetdaktsü.
Osangbenertem senden ka ayongzüka jembidang CPI (M) lenir, Sitaram Yechury-i, “Onoki balala jajatsü saka külemi longkak aittsü,” ta metetdaktsü.
Yechury-i, sorkari agiba mera ya ajanga Ato kilonser, Narendra Modi nükjidong- black money aser kiralongra anema raraba takok mangutsü, ta ashi.
Paisa, “Tang tashi nung nisung 74 asüba osang lir. Timtemertemji sensakertem dang lir. December 30 tashi sen notes tejenba amshitsü melatsüla,” ta ashi.
Nüburtemi pei meyong sen-a magizüktetba atema sorkar anema November 28 nü Congress-i districts aser states yimtitem aser banks kima nung longkak aittsü sentong lir.
Tanep longkak aitdang Congress lenir, Rahul Gandhi-i, sen notes tamshidak anentsüba ya “Alima nung ajungbena senotsü experiment agidangba tulutiba lir” ta ashi.
Iba ya joint parliamentary committee kati bushisüngdangtsüla, kechiyong iba telemtetba mesangdongdangyongi kar dangbo jelia metetdaktsür liasü, ta Rahul-isa aitsü.
Paisa, opposition party ajaki ochimashi aser black money anema rarar, saka nisung billion ka nem temereneshi magütsütsüla, ta ashi.
Longkak aitba sentong nung Congress, Samajwadi Party, Bahujan Samaj Party, Trinamool Congress, DMK aser Left party tem nungi MP temia shilem agia liasü.
Iba onük nung opposition party temi obang ka ser, Ato kilonseri Rajya Sabha nung sen anentsüba atema rasaa ashitsüla ta takhangba asütsüogo. Lok Sabha nunga o toktepba sülen opposition party temi iba onük nung vote agiteptsü atema khanga liasü.