Sen anentsüba mapa mejungi inyakba anema Congress noktaker : Ranjeet

Kohima, December 4 (TYO) : Congress Party-i senpak 500 aser 1000 anentsüba anema menoktaker saka BJP-i aniba NDA sorkari timi mapa meinyakba anema noktaker, ta Congress otongdar aser Lok Sabha MP, Ranjeet Ranjan-i ashi.
Kisama nung anogo pezübuba Hornbill festival nung adenba sülen Ranjeet-i osangbener senden ka nung jembidang, “kiralongraba, taila sen amshiba aser ochimashi azüoktsü atema BJP sorkari sen anentsür ta ashibaji tai lir,” ta ashi.
“Kiralongrartemi India nunger sen memelener saka parnoki ‘pound’ aser ‘dollar’ nung melener.” ta lai ashi.
Ano laisa taila sen amshiba indang olen ka ashidang, senpak 2000 tasenbaa taila menünga amshir kechiyong ajizüka menüngtsübaji kanga tezüba lir, ta Ranjeet-isa shisem.
Ozüng alema amshiba sen nokdangtsü atema sorkari sen anener ta jembiba atema laisa ashiba agi, linük nung sen amshibaji noklang nung shilem 12 dang aser iba nung ‘black money’ shilem ka den ishiba lir. Ajisüaka, ozüng alema amshiba sen teimba shilemji bank transaction ajanga amshir aser bedanglen bank tem nung rizünga lir, ta Lok Sabha MP Ranjeet-isa ashi.
Sorkari shitakba ozüng alema sen bener marutetba agi linük nung nisung crore 100 sen melentsü atema tarensena nokdakdaktsütsü telemtetba agi. Nisung crore 100 nungi crore 45 ji anogoshia aayangertem aser tilateri shishilembartem lir, ta laisa shisem.
“Sorkari sen tejen anentsüba ajanga asen linük sen crore lakh 1.3 shi akoksaogo aser sen tasen menüngba nung sen crore 13,000 shi endokogo. Sorkari sen anentsüba ya shitakba ozüng alema sen amshiba aputsüba atema asü public timtemdaktsütsü atema lir” ta laisa asüngdang.
Narendra Modi-i aniba BJP sorkar ajangzüktsü atema inyakba ka ta nübortemi kobi melii meteta arutsü. BJP sorkari mezüng parnoki ozüng alema amshiba sen melenba sülen linük nung tanüngba nübortem asoshi khuret ajurudaktsü, ta laisa ashi.
Ranjeet Ranjan-isa ashiba agi, Centre nung Congress Party-i sorkar yimsü asütsü tashi angutsü.
Anungji, Nagaland nung Congress züngsemtemi state ajungkettsü aser renlokdaktsütsü asoshi sentongtem atongtsüla aser itemji Central Congress lennirtem dangi abentsüla, ta AICC Spokesperson, Ranjeet-isa ayongzük.