Sen anentsüba telemtetba magientsü: PM Modi

New Delhi/Ghazipur, November 14 (Agencies): Sorkari ajungbena sen 500/1000 note anentsüba anema opposition party temi iba telemteba meyipa agitsüla ta ola adokdang tanü Ato kilonser, Narendra Modi-i, ochimashi aser black money anema raraba nungi ni matsüngshitsü, ta shiogo.
BJP bangdak lenirtem aser Cabinet minister tem senden nung Modi-i, linük nüburtemi sen anentsüba telemtetba pelaa agizükogo, anungji iba telemtetba magientsü, ta metetdaktsü.
Paisa, opposition party temi rongshiba ajanga party aser sorkari masetshitsüla; opposition-i iba ya nokdangtsü meranger, ta ashi.
Parliament nung ayonga amenba senden nungji BJP Tir, Amit Shah, Union minister tem- Rajnath Singh aser Arun Jaitley na aser BJP lenir tain, LK Advani nungera dena liasü.
Senden amenba mapang nungjisa opposition party balala nungi lenirtema Parliament nung adenshia iba onük atema o lemtepa liasü.
Congress, TMC, RJD, JD(U), CPI aser CPI(M) densema opposition party temi iba senden nung shilem agi.
Iba onük nung sorkar anema nokdaktsü asoshi West Bengal Chief Minister, Mamata Banerjee-i opposition party tem longjemtsü ayongba mapang ka nung iba senden menogo.
Ano Uttar Pradesh, Ghazipur nungi tanga osang ka nung tanü Hombarnü Ato kilonser, Narendra Modi-i, “Sen anentsüba sülen sensakertem ayipjanga mejanger saka takartembo amoi aotsü mozü bushia tesem ka nungi kati asemzüteper,” ta ashi.
Assembly election agitsü aliba state, Uttar Pradesh, Ghazipur nung BJP nüboyim sentong ka nung Modi-i, “Sen note anentsüba ajanga nüburtemi timtem ajangshibaji ni angateter. Rong tasen atepba ajanga teshinem menemer, ajisüaka ibaji nüngdak,” ta ashi.