Sen arulen mesayutetba taa

Tamil Nadu nung Chief minister akümtsü lia mekümjungi tepuokdaki aila Sasikala Natarajan dak atalokba otsü ya linük nung asenok ajak asoshi teti atema tatishitsü aser tansütsü aketba mapa ka asütsü. Atangji, taoba Tamil Nadu Chief minister, asür Jayalalitha mezüng chief minister 1991 küm nungi 1996 tashi inyakdang, Sasikala densema parnoki rongsen bendenbaji tamamangtsüka liasü, ibayongji parnoki bendenba rongsen arulen lenmang metetnüa tangari parnok anema okadak 1996 küm ken o benok. Atangji, kasa ken o nung parnok ajak tamalena tepuokdaki ogo saka Karnataka  high court-i bail agütsüba ajanga parnok ajak chioker lia, yaküm küm-a Jayalalitha-bo kenbo puoka ayu aser la December 5, 2016 nü süa adokba agi la anema ken o agüja alibatembo agienogo. Okadak ken o agütsür obendang shitak mangu küm 20 jembidena arubaji asenok ajak asoshi mapang talangka asütsü. Ajisüaka, menur asüyonga tang linük nung obendangdak tematiba supreme court nung obendangertemi ochimashi rongsen bendener yimsüsür aser ketdangsertem anema akümlir ajak tan asütsüsa temerenshi agütsüba obendangji linük asoshi temoatsü asütsü. Jayalalitha aser lar medemtsür Sasikala nati küm 20 jakdang küm pongo nung bendenba rongsenji sen crore 66 jenjang liasü. Atangji, tang Nagaland nung alir yimsüsür aser tulurtem asoshi ibaji sen aika masütsüa akok saka sen kwika südir süang, iba senji kong nungi aru mesüra kong nungi aa, iba lenmangji sayutettsüla. Aji oda, chief minister ita sen kija agi mesüra Sasikalai inyakba mapa kija nungi küm pongo nung sen crore 66 tashi jenjang rongsen bendentettsüsa inyakbaji tamamangtsü mapa ka liasü. Nagaland ama masü tanga state nungbo pei-i aatetba nungi ‘Income tax’ agütsür, anungji income tax agütsü dangji kong nungi aruba sen agütsüar, iba kuliji metetdaktsür. Ibayongji, ochishia inyaktsüsa akümer. Tatishitsü agi, nisung ka ita nung ajaki meteta anguba senji meyirijang tenem asütsüa akok, ajisüaka pai küm pongo tsüngda sen crore ka-ana jenjang kiojen yanglura, iba rongsen jenjangji pai aaba sen jenjang dang nungi kanga agia teimba, anungji pai item rongsentemji kong nungi bener aruar tejangja kuli shitettsüla. Iba jagi ochimashi mapatem tuluka nokdanger. Atangji, Nagaland nungbo Tsüngrem tsüngdang ochishia alitsüba dak alaka income tax agütsütsüsa ozüng mali, anungji ajaki meteta kü ita senbo tilaka dang asütsüa akok saka kü ita sen aser ni’ inyakba nungi aruba senotsü den kenyongi mesütep sen crore ter-metsü jenjang ali alia kiojen yangluaka, tebushir mali ni sünütsü asütsü koka lir. Iba jagi nisungtem aika kecha meinyaki takar akümer aser alimabo takongba akümer. Ashi, asen lima nunga income tax ozüng ya ali asübo mesüra pei aaba rongsen dang nungi mesütepi rongsen bendenba bushir ali asübo teinyakertema kanga kümdangla aser Sasikala nunger amaji tulutibai anir tanidaker aika tepuokdak sünga lila. Tang Sasikala nem obendangertemi agütsüba temerenshiji küm pezü tepuokdak alitsü aser sen crore ter senchi achitsü. Iba denji ano lai jangrayonga küm ter election-i meitettsü. Iba kasa ochimashi ken o nung kasa tepuokdak la dang masü saka lar kingertema lir. Atangji, la tepuokdak liaka, Tamil Nadu nung lai yimsü asür amai lai mulungba nisung chief minister aser yimsüsürtem ayutsü kechiyong la dak tashi tuluka lir. Ajisüaka, yimten tashi aser alima rongsen dang nungibo tenüng tajung akabajisa tajungba. Yimten nung khen nübortem tenzüktsü maongka angudang pei agitsü rongsen bendenbaji amajok rongnung amajok lir, item jagi Jayalalitha aser Sasikala nungertemi ajuruba timtem, shisabolu aser maksüang ajangzüktsü aser item rongsentemji pei tenük agi ngua samadoktsü. Iba kasaji asen lima nung asenok rongnunga atalokdagi. Item nungji yimsüsürtema, tulurtema aser nübortema tan asütsüla.