Sen chitsür masü, agütsür südaktsüner !

Nagaland mali asübo nübortem aika asüngnep kong nungi bener arua sorutsüar memeteti aonung yipteni aiba tia nung liaka, nisung kar meyong ki tajung paikaya yanglua makala aser lenmang mejungaka gari tajung paikaya mesenzüla. Itemji Nagaland tenüng nung maongka agirtemi anguba temoatsütem lir. Ibaji meteta asüngnep sorutsü maka ser shisaboluseta yipteni aiertem tia indang bilemdangtsü melen, tanü Nagaland nung yimsüsürtemi pei jenjang ajungtsü dang bilema inyakba angudang kanga jashia bilemer. Aji oda, gari tajung nung mener lenmang tamajung nung senzüdang akseta bilema itemji tekaratiba nung yanglutsü bilemtsü melen pei ajangzüktsü asoshi dang bilema yimten nung jangjamajang senzüba angudang tezüdanga bilemer. Iba amaisa yimsüsüra Nagaland ya asenoki anepalu mesütet India nem meyipa agütsütsüsa akümtsü. John F Kennedy-i America nungertem dang, “Americai ni asoshi kechi inyaktsür ta masü ni America asoshi kechi inyaktsütettsü ta asüngdangang,” ta ashiba ama, tanü Nagaland nung chief minister-i anir yimsüsür aser ketdangser ajaki nia Nagaland ajungtsü asoshi kechi inyaktsütsü (?) ta asüngdanga nübortem tenzüktsüla. Asenokbo Nagaland nung election-i aiba ya pei asoshi sen bendentsü aier amai bilema aier. Iba jagi takartema pei akaba ajak tapayu mali endoker aser makartema kecha tarendak mali ali kimong ayoker aser sentem tulu sen apur election nung tokteper. Ibayongji, tadok nü nungi yimsüsüri yimsüsür memesük sen bushitsü aser sen meshitsü tenzüker. Iba jagi Delhi nungi sen yokpet yokaka teyokmong maka yangku tapok nung asemer ama teti maka aser meperiba indang dang jembia alir. Atangji, chief minister akümtsü rakteptsübaji tim aser jenjang tajung angutsü merangbajia maitsür. Ajisüaka, yimsüsür asoshi mendenji tongtibang masü saka mapa agi sayua nübor tenzükbaji dang lir. Aji oda, chief minister kümaka mesüra cabinet minister kümaka pei yimti yimdong meyanglutetba chief minister aser minister-ji kechi sütsü? Chief aser minister akümbaji Delhi nungi aruba sen lemsaa chia kazütsü atema masü saka item sen jagi nübortem anepalutsü aser Nagaland tajungba küma yanglutsü asoshi inyaker. Aji oda, mapa agi mata, MLA dang süaka nübortemi shimtetba lenir ka ama, pei agi pei nümadanga aser nübortemia pei taküm aser mapa agi nümadangtettsüsa alitsübaji yimsüsür ka mapa asütsüla. Joko, Nagaland tenüng nung Delhi nungi yokba sen nung ‘commission’ agia kazütsü atemabo yimsüsür masüang tajungba. Aji oda, sen bushia bener arua nübortem anisüngzüka alitsü asoshi mapa adokdakja parnok nem inyakdaktsütsü melen Delhi nungi yokba sen nung percentage ka agizüka agitsü atemabo tamasayongi yimten nung shilem magiang tajungba. Aji oda, Nagaland nung yimsüsürtem ya meraketa alitsü atema terenloka mapa nung Commission agir Commissioner masütsü aser percentage agir Mr. Percentage makümtsüla. Joko, Naga nunger yimsüsürtemi pei kija agitsü rongsen ojang bendentsüla. Yimsüsür asoshibo talidak ki aser anogo shia chiyongtsü kara ojang ta asüba tangatetba nung nübortem tenzüktsüla. Talangkati maoyonga, Tripura chief minister, Manik Sarkar-i commisison aser percentage agitsübo yutsür pai pa ita sen magii par party nem agütsür aser pa kinungtsü, shiba central mapa nung officer liasü, la pension sen agi kibong mesür. Aji oda, Agartala yimti nung chief ministerba kinungtsü Panchali aiben rickshaw nung bazaar-i oa angur. Iba denji pa nem par party-i ita nung sen meyirijang pongo agütsür. Iba tashi nungji 1998 küm nungi tang tashi Tripura nung CPI(M) teloki yimsü asür aser pa den shiangaia chief minister merakteper. Aji oda, alima rongsen jenjang asadangba nungbo India nung chief minister-tem rongnung tesensaktibaji Manik Sarkar lir. Ajisüaka, ochi nungbo pasa takatiba, iba jagi Tripura lima renloker aser nübortemi temulung lemtetter. Iba amaji Nagaland nung chief minister aser yimsüsürtem ajak südaktsüner.