Sen crore aika jenjang SK Oil tim mesüi amshiogo: ACAUT Nagaland

Dimapur, October 23 (TYO): State sorkaribo ozüng alema totzü meyoktepba nung tongti süa tai tonglokja alirtemi dang iba mapa inyak ta bilemdaktsütsü meranger, saka iba mapa nung tai tonglokja alirtem den F&CS department aser SK Oil stockiest temi tesüiba küm 15-20 tashi SK Oil litre crore aika tim mesüi amshiogo, ta Media Cell, ACAUT Nagaland sangdong ka nung metetdaktsü.
Iba kuliji ACAUT Nagaland nem SK Oil supply & distribution indang RTI document agütsüba ajanga angur. Iba inyakyim ajanga yimsüsürtem aser tongti ketdangsertem densema nisung aika keti sen crore noklang aika ogo. Tesüiba küm 12 tsüngda F&CS department-i sensaker nem agütsütsü anguba SK oil litre crore 12 shi black market-i belen, ta parnokisa ashi.
Iba inyakyim ajanga linük nung ozüng alema totzü meyoktepba timba anguba state ji Nagaland aküm. SK totzü litre crore 12 ji tanü shishilembaba ama litre nung sen 40 agi odangra, sen crore 500 shi adoker, ta ACAUT-isa metetdaktsü.
Nagaland nung Chief Minister inyaka arurtemi F&CS department ketdangsüa inyaktsü meranga aruogo aser 2009-14 tsüngda SK Oil aruba ajak ama belenba agi sensakertem ket matong. Cabinet-i ochimashi anema raratsü ayongzüktsü melena, CCoFA-i ayongzüka agiba lungkak aitba sentong jiang ozüng alema inyakba sentong ka ta lemtet. Iba jagi, tang aliba sorkari ochimashi inyakyimtem pusema nungiter ta jungkai adoka sayur, ta ACAUT-isa shisem.
SIT-i benokba Chargesheet nung tadentsüpur ajak medenra, aser tesüiba küm 15-20 tsüngda SK Oil tim mesüi amshiba indang medeni lira, tensa mejungi akümtsü aser iba tebilemtsüji state sorkari abentsü. Anungji, Nagaland nung jang, dal, shinü, wheat mesüra kerosene angutsüpurtem ket tonga aotsü atema, tamasa Food & Civil Supplies Department kanga junga merüktettsüla, ta ACAUT Nagaland-isa takhangba agütsü.