Sen dalang agi shisaliok tajung agütsütsüla: Yitachu

Kohima, November 08 (TYO): Mongolbarnü School Education & SCERT Minister, Yitachu-i, telemsa kecha makai ajak nem sen dalang agi shisaliok tajung agütsütsüla, ta ashi.
Kohima nung mezüngbuba Government High School ji 1941 küm amenoka liasü, aser iba school, Rüzhükhrie Government Higher Secondary School küm 75 ajungba Jubilee sentong nung jembidang minister-i, “Asenoki sen dalang agi shisaliok tajung agütsütsü nüngdaker, kechiyong sen tasak agi shisaliok agütsübaji nisung aikati matutsü aser iba ama tensa ka nungji lokti azükaru masütsü,” ta metetdaktsü.
“Asenok school aser tesayurtem peria lir, aser SSA, RMSA ama projects aser NEC o DoNER ajanga mission infrastructure peria lir, ajisüaka asenok shisaliok tajung agi anünger,” ta paisa ashi.
“Asenoki lokti rangben azükarudaktsünüra shisaliokji sen dalang asütsüla aser aser angati shisaliok tajung agütsütsüla,” ta minister-i ashi.
Iba school küm 75 ajungba dak sentakba nung Minister-i tesayur aser kaketshirtem dang state nung mezüngbuba sorkar school, RGHSS Kohima yagi shisaliok tajung agütsütsü aser Naga lokti nung temelenshi bener arutsütsü nükjidong yur inyaktsüla, ta ayongzük.
“Tesayurtemi shisaliok tajung agütsütsüla aser kaketshirtemi takok anguba ajanga parnok nüma tangtettsüla. Iba school indang jenjang, akhümket aser nükjidongtemji asenoki tiptema ayutsü nüngdak,” ta pai ashi.
Minister-isa school temeket nung Jubilee nüngshilong azüngja liasü.
Iba sentong nung tetushi tejaoker, Youth Resources & Sports, Music Task Force & State Lotteries Parlamentary Secy, Khriehu Liezietsu-ia school-i shisaliok tajung agütsüba atema tenüngsang agütsü.
Paisa, RGHSS school ya meranga inyakba sorkar school tem rongnung ka lir aser iba school nungi Naga nunger rongnung tongtibang lenir aser ketdangser aika adokogo, ta ashi.
Sentong nung pai Jubilee nüngo sayatsü.
Kasa sentong nung Kohima deputy commissioner & school managing board chairman, Rovilato Mor aser Angami Baptist Church Council Executive Director, Rev. Dr. Atsi Dolie natia jembia liasü.
RGHSS Principal, Lebu Krose-i Jubilee nüngo nungji, RGHSS (taoba mapang Government High School) ya 1941 küm amenok aser Nagaland nung sorkar school tejentiba lir ta zülua lir. 2002 küm iba school ya higher secondary-i ajungketa science, commerce & arts stream agütsü.
Tanep RGHSS Headmaster Kepelhoutuo Chüsi-i lokti pelaa agizük aser RGHSS principal, Krose-i tepela anküp o jembi.
Sentong nung NPF Tir, Dr. Shurhozelie Liezietsu, Parliamentary Secretary tem- Khriehu, Deo Nukhu aser Toyang nunger den retired DGP, K Kire aser tongtibang nisung aika densema liasü.