Sen dang nungibo nisung tuluba ta asüba tangateba nung Arogoi yariteper

Guwahati, November 18 (Agencies) : Sorkari senpak 500 aser 1,000 agienba ajanga nübortem timtem balala ajuruba mapang, Guwahati nung putu 19 buba nung tentetba arogo kati sen dang nungibo nisung sentiba ta asüba tangatetba nung teyari agütsür.
Guwahati Baptist Church-i Tajung Samaria ama senpak 500 aser 100 tejentem agir aser ibaji tasümang süngden alirtem dang nungi parnoki agir. Parnokisa tasümang süngden alitsü makoker nembo angati dang agütsür.
Tenlaki telongtet nung Sunil Sarkar ta ser nisung kati carpentry dokan ka lapoka lir aser pai tasümang süngden alir arur ka danga temulung mesüi meyoker. Guwahati nung Khristan tamangertem asoshi tasümang süngdenji Guwahati Baptist Church nung dang angur aser Brihostibarnü parnoki sen 3,000 (senpak tejenba) yong nisung ka dang süngden ka ayok.
“Meimchir yariba aser jungtepba tenüng nung onoki sen tejentem agizüker. Onoki bank nung item sen tejen melenteptsüji kanga tasak asütsü ta meteta lir, saka iba atema shisa mebulur” ta Guwahati Baptist Church pastor, Aziz-ul-Haque-i osangbener dang ashi.
Iba arogo ya Guwahati nung Assamese, Bodo, Garo aser tanga kintem nungi Khristan tamangertem asoshi tongtipang arogo ka lir. 1829 küm taoba British commissioner David Scott-i British Missionary Society dang Guwahati nung mission centre ka lapoktsü atema mepishiba mapang iba arogo ya tentet.