Sen-ibai kechi atema tajung ?

Shibai sen meimer sen agi tenük masüngtsü; shibai rongsen meimer rongseni tenük masüngtsü: yaa amajok dang lir. Sayutsüngir 5:10
Asenoki asen teka nung aliba dang nungi tali akatsü meranger. Tali aginüdang kar merumerua akümer. “Kechiba” ta asüngdanger. Senji tamajung masü. Iba yagi tesüngmangtsü mapatem inyaker, missionary yoker, nai missionary mapa nung yarir. Iba yagi asen lima nung Tsüngrem yimli renlokba nung yaritsü akok. Ano iba yagi Khristantem tejangraba samadaktsütsü akok. Tajangzük makaba sen lalushibongtsü akok. Solomoni A. Shin nung ashir, asenoki rongsen dak ranglokra, iba nung tashi kanga dener mongzü ama yima oadoktsü. Pauli ashir asenoki rongsen meimbaji (rongsenji asen ranglokdak kümdaktsüra) tamajung ajak adokdak tera lir.
Nai kwika aa arudir arung, rongsen nung tepela lir ta bilema bendenra na kodanga peria makatsü. Na kechi jenjang nung lidir liang, sen agi peladaktsütsü ta kodanga bilema teli. Charles Wesleyi ashi asenoki aseni akokba tashi aotsüla, aseni akok tashi rizüngtsüla aser akok tashi aseni agütsütsüla. Pa taküm ali tashi pai bena aruba nung peria ali, saka kecha makai asü. Solomoni ashi, sen meimba aser iba nung talubusa alibaji amajok. Ibai tetezü maka. Ibai jenjang maka. Iba yagi tang dang temulung mesüdaktsütsü masü, saka kodang asenok südir, asenoki item ajak tesülen toktsütsü.
Tsüngrem, tanü Nai moatsüba nung ni temulung tamang katetta alitsü yariang. Ni sen nung masü, Ne dak ranglokdakjang. Amen.