Sen kongang mayur !

India nung sen 1000 aser 500 note melendoktsü tenzükba agi takartem dang masü saka sensakertema timtem kanga ajurudagi. Joko, shishilembadak dokan  aika nung sen 1000 aser 500 note magili asür aser aika ket nung sen 50 aser 100 note maka. Ano, iba denji timtem kaji sen tasenba akayonga aji 2000 note dang anungji terasatsü tasak, iba yagi tayoker aser talirtem na prongla kanga timtemdagi. Ajisüaka, timtem tulutibajibo takartemi ajurudagi. Parnokjibo timtem dang masü saka shisabolu dena lir. Aji oda, government-i mapang agüja aliba ama December 30 tashi nung sen 1000 aser 500 note memelendoktetra itemji takidak maka akümtsü. Ano, külen takartem  ket nung sen 1000 aser 500 note-temji crore aika akatsü, ajisüaka tang itemji bank nung yudi asü nung Imcome Tax purtemi iba senji kong nungi angu ta tasüngdangba alitsü aser ibaji shitak mesayutetra sen ajakji government-i rakzüka ayutsü aser iba sen nungi 25 % senchi achitsü aserang ano küm tenet tepuokdak ayutsü. Iba ama timtem jagi takartem pei sen bendena ayuba kongang mayu timtem shisaboludagi. Aji oda, joko Nagaland nung dena takartem sen crore pezü pongo tashi bener senzüdang apuba otsü atalokogo. Atangji, sen melendokba mapa ya India ajunga nung külemi dang inyaker asünungji ajaklen kasa timtem aser shisabolu lir saka Nagaland ama state tila nunga takartem aika sen konganga mayu timtema shisabolua alitsü. Item takartemji aika tsümartem asütsü aser parnok den Naga nunger kar adentsü. Aji oda, bank liaka bank nung meyui pei kidang sen lakh aser crore aika bendena ayubaji teimbaka ochimashiba len nungi anguba sen asüba agi tangar nem memetetdaktsüner alitsü aser ano tanga kuli kaji tsümartembo income tax magütsütsü mechi nung bank nung mayur. Talisa Nagaland nung government-a mali ama terenlok mapa kecha meinyak kümsa küm süidaktsüba yari ya kar ket nungbo mapa meinyaki anguba sen aika rezünga alitsü. Shitakba nungbo item senji nübortem indang miimzüka bendenba rongsentem lir. Iba amaji shitakba teyari angutsü purtem nem magütsüi ketdangsertemiang miimzüka agiba ajanga nübortembo tesensakba akümer aser temeyonga mekürak nübortem meyong sen ajak miimzüka agiba ajanga karbo takarba-takarba akümba angur. Ano, nisung karbo ashiko election-i aitsü tebilemba nung kidang sen aika bendena yua alitsüa akok, Tanü linük nung sen 500 aser 1000 note ajungbena melentsü apusoba ya ajanga item sen ajakji tamakitsü kümadoktsü. Iba jagi taruba election nung sen agi nübortem mesüzüktsü bilema alirtem aika tebilemba matongtsü. Ashiko, Nagaland nung alir Khristan-tem tai memenadaktsütsü asoshi tanü linük nung Hindu nunger ana , center nung Narendra Modi aser Nagaland nung P.B. Acharya na Tsüngremi amshir südi ta bilemer. Aji oda, Narendra Modii asenok Khristan-tem ochishia melinüyonga ochishia alitsüsa inyaker aser ano külen Nagaland angh P.B.Acharyai anogo shia tesem ka nung mesüra ka nungbo Naga Khristan-tem ochimashiba indang jembir aser odia arütsür. Naga nungersa süaka karbo pei-i bendenba sen onsara asübayong meyutettsüsa shisabolu dang, ano karbo taonung mesüra asüngnepbo kidang chi tesorutsü maka shisaboluba purtem jenti lir. Kasa nübortemsa süaka telok ana tetsüngdaji talangka, iba jagi Nagaland timatemer. Atangji, alima nung ajakbo kasasa mesütettsü, teti kar takarba aser kar sensakba asütsü. Ajisüaka, takar akümbaji tangar indang auyaa akümba mesüra nübortem indang miimzüka agiba ajanga takar akümba süra, ibajibo tepelatsü masü lendong aser shisabolutsüang aika lir aser ano külen sensaker akümbajia azümasenba aser chidiyongdiba agi akümba süra, ibajibo alima nung komaka temelenshi tajung aruyonga, item temoatsü aser maongkaji magitettsü. Atangji, tanü lima ya jangratemtsüka, mapa inyaker meinyakma aser teinyakerbo ochishia sen dang sen maja aatsüba lenmang lir. Item temoatsü aser maongkatemji tanü tsüraburtemi mashilen nungi agitsü merangba amai mesüi lanurtemibo indangindanga agizüka asen limasa topur tajungba yanglutsü imlar.