Sen lakh 2 tema agizüktsü atema PAN nüngdaktsü: Jaitley

New Delhi, December 15 (Agencies): Linük nung ochimashi sen asadangba nung yaritsü asoshi sen lakh 2 tema bank nungi agizüktsü mesüra enoktsü atema Permanent Account Number (PAN) nüngdaka akümtsü tetuyuba sorkari memenui sangdongtsü, ta Finance Minister Arun Jaitley-i Mongulbarnü ashi.
“Ochimashi sen atema olemtep akatsü aser memenui PAN ali nungdang sen lakh ana tema bank nungi belentepa amshitsü asoshi tetuyuba agütsütsü aser iba inyakyim ajanga ochimashi sen amshiba noktangtettsü,” ta Lok Sabha nung ‘Supplementary Demands for Grants’ olemtep akaba mapang Jaitley-i telangzüba ka agütsü.
Jaitley-i, 2015-16 Budget osang agütsüba PAN ajanga dang sen lakh ka tema agi shishilembaba mapa ajak inyaktsüla ta benoka liasü.
Iba sülen MP tem, MLA tem, trade aser industry association balala nungi Jaitley-i PAN atema benokba olemtep nung dena liasü.
Budget atema jembidang pai, “Sen lakh ka tema agi shishilembadang bendang linük sen nungi ajangzübatem indang osang shitak bendena agütsütsüla,” ta ashi.