Sen lenzüka agitsü merangbaji khenyongi magizükteter: Justin

Ottawa, Metsüremi 03 (Agencies) : Steel aser aluminum alizüka bener aoba nungi shilem kar lenzüka agitsü atema US Tir, Donald Trump-i sentong yanglubaji “khenyongi magizükteter aser ibaji ajanga mangatettep tulu adoktsü, ta Canada Ato Kilonser, Justin Trudeau-i metetdaktsüogo.
Trudeau-i ashiba agi, Trump-i inyaktsü sentong yanglubaji ajanga Canada-US naprong arrtsülen rongsenren tsütsü timtem adokdaktsütsü, ta Xinhua osang ajanga metetdaktsü.
“Steel dak sendakba maparen nung Canadian dollar billion ana (US dollar 1.6 billion) shi talila US-i onok dang nungi ajangzüker asünungji, linük ana tsüngda steel mesüra aluminum dak sendakba nung parnoki senotsü talila lenzüka agitsü merangbaji onoki khenyongi magizüktettsü,” ta Trudeau-isa jashia shiogo.
Paisa ashiba agi, linük ana tsüngda security tsütsü amalitepa inyaker asünung, linük kümzüka ayutsü atema ta shia US nungeri senotsü talila meshisemtsüji menüngdaker.
Canada, US aser Mexico linüktem nungi adsenshia North American Free Trade Agreement (NAFTA) dak sendakba ken o jembishitsü adenshia lia sorkar tenüng nung saru meshitsü renema aliba indangji Trump-i metetdaktsü.
Steel nung noklang shilem nungi 25 aser aluminum nunga shilem 10 lenzüka agitsü renema alibaji taruba hopta nungi mapa küma inyaktsü, ta yashi Trump-i metetdaktsü.
US market atema steel teimtiba ayokba linükji Canada lir; 2017 küm US nungeri steel alizükba ajakji apidangra parnok (Canada) kija dang nungi steel agibajia noklang shilem nung 16.1 liasü, ta US Commerce Department ajanga metetdaktsüogo.