Sen magizüktetba agi ano nisung trok tashi peisasa süogo

New Delhi, November 16 (Agencies): Tesüiba anogo ana-asem tsüngda pei sen manguba atema bank, ATMs nung tarensena nokdakang nisung asem asü, nisung asem peisasa asü aser Ghaziabad nung kati pasasa rongseta asütsü meranga liasü.
Hombar aser Mongobar na nung nisung trok asü; nisung asem Uttar Pradesh nung asü aser Bihar, Telangana aser Gujarat state shia nungi nisung kaka süogo.
Mongolbarnü Ghaziabad nung aluyimer ka tenüng agi, Ram Mehar Singh Yadav-i doctor ajurutsü atema pa ket nung sen maliba agi Sahkari bank nung pasasa rongseta asütsü merang, ajisüaka tangari pa nokdang. Iba sülen Bank ketdangsertemi pa indang sen 2000 melentsüba sülen ang pa kidangi ao.
Hombarnü Gujarat, Surat district nung Indira Modi (22)-i miim ajemba sülen Mongolbarnü nija hospital ka nung asü. Lai arishi küm ka jabaso nema miimji jemdaktsü saka pabo taküm kümzük.
Hombarnü Muradpur yimtak aluyimer Deshraj Singh (55)-i Dec. 5 nü lar jala kiyimtsü atema sen apua bank nung inoktsü, saka pai iba senji magizüktetba ajanga soseta asü.