Sen nokdangba ya 51%-i junger ta bilemer

New Delhi, November 19 (Agencies) : Tang senpak 500 aser 1000 tejenba nokdangba atema asadangba ka nung nisung noklang nung shilem 51-i iba inyakyim junger ta ashir aser noklang nung shilem 24-i kangsa majung ta ashi.
Tanüngba noklang nung shilem 25-i junger majung ka ta ashir. India kübok yimti 200 nungi nisung 9000 dak temai LocalCircles-i agiba iba asadangba nung shilem agia liasü.
Sen nokdangba mapa ya kanga ulura asünung iba inyakyim metenzükdang yongi tang joko anogo 10 nü buba Bank aser ATM tem kima nung tarensen talanglang nokdakba tensa majurutsüsa sorkari sentong tajungba ka yanglu asübo kanga ajungba asü, ta nüburtemi ashi.
Nüburtemi ashiba sülen sorkari agizüka inyaka arubatem; maidoktetba shiai amshiba, kiyimertem sen talila agizüktsü melaba, mobile ATM amshiba aser aluyimertem nem nüngdakba sen agütsüba yimyatem ya mezüng yongi benshitsü mela asübo timtem yamai madokla. Ano Bank aser Post office mapa nungi anisüngzüker alirtem tanaben mapa nung yariteptsü aser teintet rogotem den tetsürtem atema teyari agüjang ta ashiba aika meinyaki lir.
Mezüng iba asadangba mapang ATM aser bank tem nung tarensena nokdaka alirtemji noklang nung shilem 40 bo tangar kar atema nokdaktsürtem liasü aser ATM tem-a noklang nung shilem 44 mapa meinyakba nguteta liasü.
Nübur noklang nung shilem 79-i iba timtem atema kecha jashia mali aser shilem 18-i kanga timtemer saka iba inyakyim nungiter. Noklang nung shilem 3-i ang sorkari iba mera agiba anemer, ta iba asadangba osang ajanga metetdaktsü.