Sen note nung mezülusatsüla: RBI

Mumbai, July 16 (Agencies): Brihostibar nü Reserve Bank of India (RBI)-i nüburtem dang sen note nung tawa temesüng aliba nungji mezülusatsüla, kechiyong sen taila bendangtettsü asoshi iba tawa nung tongtibang security feature lir, ta metetdaktsüogo.

RBI-isa ashiba agi, sen note nung aliba tawa nung nüburtemi züngdangba, tenüng mesüra o balala zülur aser ibaji ajanga senji raksar.

“Sen taila bendangtettsü asoshi sen nung tawa temesüng aliba nungji tongtibang security feature ka lir. Iba tawaji raksaba ajanga nisung kati senji shitak asü taila’ar mebendangtettsü,” ta RBI-i sangdong ka ajanga metetdaktsü.

“Anungji sen raksatsüsa nüburtemi kecha meinyaktsü mepishir,” ta RBI-isa ashi.