Sen notes anentsüba ajanga nisung 55 süogo, PM-i tatok meshitsüla: Congress

New Delhi, November, 19 (Agencies): Ato kilonser, Narendra Modi maneni aija tanü Congress-i, Ato kilonseri telemtetba tesashi agiba ajanga nisung 55 süogo, anungji pai asürtem kinünger aser linük nüburtem dang tatok meshitsüla, ta ashi.
Congress tongti otongdar, Randeep Surjewala-i, bank aser ATMs nung nokdakdang asür nisung 55 metetdaktsüba den külemi asür kinüngertem nem temenok sen agütsütsü aser parnok asüba kuli bushisüngdangtsü atema takhangba agütsü.
“Ato kilonseri telemtetba tesashi agiba ajanga nisung 55 süogo. Iba ya shiba ajanga? Ato kilonseri asürtem kibongtem dang tatok meshitsüla aser linük nüburtem danga tatok meshitsüla. Pai aginüba apia telemtetba agiba ajanga iba ya atalok,” ta Congress otongdari osangbenertem dang ashi.
Paisa, “Sorkaria asür 55 kibongtem nem sen temenok peria agütsütsüla. Parnok asüba ji bushisüngdangtsüla, iba sülen temerenshi agütsütsüla,” ta ashi.
Ato kilonseri inyaker sülen ang shisadanger, ta aija Congress leniri, iba telemtetba magidang sorkari sentong junga meyanglu, aser ibaji ajanga linük nung senotsü timtem tulu ajangshia lir, ta ashi.
Surjewala-i ashiba agi, Ato kilonseri aginüba ama inyakba ajanga linük nüburtem timtemer, ajisüaka sen tamshidak anentsüba atema tasüngdangba kara Ato kilonseri parnok dangji ‘linük anemertem’ ta ajar.
Congress lenirisa, banks aser societies densema aliba cooperative sector nem sen tejen amshitsü temelaba agütsütsüla, kechiyong alu nung aonsotsü tsünüba mongpu nung yimtsüngtem nung timtem tulu ajangshia lir, ta ashi.
“Khen nung dang Modi-i aluyimba sector jenjang raksatsüogo. Taoksatsü kaji, Modi sorkari parnok indang Agriculture Ministry-i benokba onüktem magizük; ministry-i aluyimertemi metsüjang aser fertilizers alitettsü atema sen tejen amshitsü temelaba agütsünüa liasü. Ato kilonseri aluyimba rongsenkettsüng raksatsüogo,” ta paisa shisem.