Sen notes tejen 10 dak tema bena alirtem dang senchi achitsü

New Delhi, March 02 (Agencies): Yaküm November 8 nü anentsüba sen 500 aser 1,000 note tejen 10 dak tema nisung kati abentsüji tang nungibo ozüng alema lir, kechiyong linük Tiri ozüng tasen ka agizükogo.
February 27, 2017 nü Tiri Specified Bank Notes (Cessation of Liabilities) Bill, 2017 agizükogo, aser iba mapang nungi tenzüka ibaji ozüng ka kümogo, ta ketdangsertem osang ka ajanga metetdaktsü.
Taoba ita Parliament nung iba Bill agizüka liasü, koba ajanga nisung kati sen 500 aser 1,000 notes tejen abenba, belenshiba mesüra agizüktsü memelar.
Nisung ka ket nung sen notes tejentemji 10 dak tali alitsü memelar, ajisüaka study mesüra research agitsü atemabo sen notes tejen 25 tashi melar.
Iba ozüng nung aibelenra senchi 10,000 mesüra sen kwi bena liasü ibaji ponguben agi tali senchi achitsü, ta iba Bill nung shia lir.