Sen nung merangloki nüburtem tenzüktsüla: Mulayam Yadav

Lalitpur, September 20 (Agencies): Uttar Pradesh nung Assembly election agitsü mapang küm ka shi dang lia, ibaji temelung nung yur Samajwadi Party (SP) tongti lenir, Mulayam Singh Yadav-i party nung lenirtem dang, sen aazüktsü nung temelung magütsüi nüburtem tajungtiba nung tenzüktsüla, ta ashi.
2017 küm tetenzüklen state nung assembly election agitsü, aser tanü pai District Magistrate tem danga state tesem balala nung temzüng alema lisem ayaba nokdangtsüla, ta shiogo.
“Yimtenren nung alirtemi nüburtem tenzüktsüla ser nung sen aazükba mapatem ang inyaker. Iba ya magizüktettsüsa kümogo. Ozü kinünger kari contract mapa inyakba nenok kari danga metet asü, aji oda süra kü dang shiang,” ta Yadav-i ashi.
Tang mezüng 1980 MW supercritical thermal power plant indang 660 MW unit lapoktsüba sülen nüburtem den jembidang pai, “Ozü party ya sensakertem atema lir, sen aazüktsü atema bilemer dang masü,” ta ashi.
SP tongti lenirisa, “Kanga tongtibang onük kar lir, aser ibaji ni jembiba den külemi tekümdangtsü o ashir. Temzüng alema lisem maneni ayar, aser ni item osangtem ajak nguogo. Temzüng alema lisem maneni yara, iba khuret ji District Magistrate temi abentsü. Lenirtema yangji densema lira tepouktaki yoktsü,” ta ashi.
“SP National Tir ji ni lir. Onoki linük nem onok tangatetba metetdaktsüner, SP ya ochimashi nung densemba party ka masü,” ta paisa shisem.