Sen peria lira kechiba bank temi sen memelentsür: Chidambaram

New Delhi, November 19 (Agencies): Tanü Congress lenir aser taoba Union finance Minister, P. Chidambaram-i, bank tem nung sen tasen aser sen 100 notes peria lira kechiba tanü bank temi sen tejen memelentsür, ta asüngdang.
Chidambaram-i twitter ajanga, “Metetjema alisang AG (Attorney General, Mukul Rohatgi)-i ashibaji shitak süra sen ajema mali, anungji kechiba tanü bank temi sen note memelentsür?” ta asüngdang.
Yashi Attorney General Mukul Rohatgi-i Supreme Court dang, sen agi anünga mali kechiyong sen 100 notes amshidar, ta metetdakja liasü.
Paisa, Supreme Court dang, linük nung automated teller machines (ATMs) lakh 2 lir, bank kongsang lakh 1.25 lir aser petrol pumps tem nung mapa inyakdar, item nungjagi nüburtemi sen angutsü ta metetdakja liasü.
Centre-i, bank tem nung sen peria lir ta jembiba aija taoba Union minister-i, “Onok indang bank/savings accounts nungi kechiba onok sen magizükdaktsür?” ta asüngdang.
“Kechiba ATMs merirjang aika mapa meinyaker?” ta paisa asüngdang.
Nüburtemi timtem ajangshiba atema sorkar aija Congress media committee in charge, Randeep S Surjewala-ia twitter ajanga, “DeMonetisation ajanga wheat yokba mapang nung tai maket aluyimertem kongshir,” ta ashi.