Sen peria mali tashi SBI branch tem shibangtsüla: Trade union

Chennai, Jan. 12 (Agencies): Sen agi anüngba tensa mesüngjem tashi State Bank of India (SBI) kongsangtem shibangtsüla, ta tanü Trade Union nung tongti lenir kati ashi.
All India Bank Officers Confederation (AIBOC) Senior vice-president, Thomas Franco Rajendra Dev-i, “Sen peria lemzükja tensa mesüngjem tashi SBI ketdangsertemi bank kongsangtem shibangtsüla. Bank nung inyakertem, parnok tai maket ser nung nüburtem terasaba ajangshiba dang nungibo khen atema bank kongsangtem shibangba tajungba asütsü,” ta metetdaktsü.
Dev-isa, Maharashtra, Madhya Pradesh aser Chhattisgarh nung külem tenzükertemibo senotsü peria lemzüktsüdar ta ashir, ajisüaka kechiba tanüngba state tem nungbo peria melemzüktsür, ta asüngdang.
“State sasep nung aser bank sasep nung senotsü lemzüktsüba osang RBI-i nüburtem nem memetetdaktsüba ajanga süngmanger. State tem aser bank tem nem senotsü lemzüktsüba sülen kechiba ibaji miimshir?” ta paisa asüngdang.
RBI-i yimtsüngtem nung senotsü peria lemzüktsüdar ta ashir, ajisüaka atangji nungbo yamaji masü, ta paisa ashi.
Senotsü agi anüngba ajanga Tamil Nadu nung Pongal benjung junga memongtettsü, ta paisa shisem.