Sen taila amshir nisung ana tepuokdaki yok

New Delhi, December 22 (Agencies) : Brihostibarnü New Delhi nung aliba okadak kati sen taila 49,88,000 amshir nisung ana küm pungu tepuokdaki yoktsü obendang agütsüogo.
Ekramul Ansari aser Sharda Shankar Mahato nati India sen taila 4,988, sen 1000 senpaktem nung, Dubai nungi Delhi tashi shibelentsü atema inyaktepba putetba sülen Additional Sessions Judge Rakesh Pandit-i tena tepuokdak ayutsü obendang agütsü.
Okadaki tena ya ozüng alema inyakba aser Prevention Act tem kübok aitsü kechiba süra tena ya ano tesüiba mapang shibangtsür aliba telungpur züngsem rongnunga liasü.
Ansari dang sen 6,000 aser Mahato dang sen 4000 senchi achitsü latettsüogo.
Okadaki ashiba agi, okartemi Ansari ket nung sen taila 4,988 bena lia apu. National Investigation Agency (NIA)-i ashiba agi, Ansari aser Mahato nati India rongsenkettsüng nung timtem adokdaktsütsü asoshi ozüng alema sen taila prokshitsü sentong yanglua liasü.
Ansari ya April 18, 2014 küm Directorate of Revenue Intelligence-i New Delhi tayimtsü anenba tesem nung apu aser pa ket nungi taila sen 4,988, sen 1000 senpaktem nung ngutet. Iba sülen Mahato apu aser iba ken o ya NIA nem nungloka yutsü.
Ansari aser Mahato naprong ya Champaran, Bihar nungi lir. Ansari ya mezüngbo Dubai nung oa sü arrba mapa inyaka liasü.
NIA-i ashiba agi, item sen tailatemji Patna nung alisang Mahato nem agütsütsü atema Ansari-i bener oyaa lia apu.