Sen taila bener nisung ana Meghalaya nung apu

Shillong, May 2 (Agencies): West Garo Hills district nung sen taila bener nisung ana apuba osang police-i metetdaktsü. Dena ket nung taila sen lakh 1.32 ngutet.
Ozüng alema inyakba nisungtemi yimtsüng nung shishilemba dang sen taila amshiba osang tejangja ka angazükba sülen police-i meita aoba nung iba nisungba ana ya apu.
“Onoki ozüng alema maparen balala inyakba nung tongtiba ana puogo aser tang par telok nung densema aliba nisungtem bushisüngdangdar,” ta district police chief M G R Kumar-i ashi.
Pai ashiba agi, ozüng alema inyakertemi yimtsüng nung kozü aser tanga osettem ali-i arur aser parnoki nikoktsütsü tamang tesemtem nung dang item oset aliba sentem agütsür.
“Yimdaklirtemi tamang nung sen taila asü masüar majiteter, aji dang masü sen tailatem shidak mesüka yanglur aliba ajanga majiteti parnok jenbur,” ta Kumar-i ashi.
“Item ozüng alema inyakba nisungtem India nung sen taila proktsü asoshi tanga linük den sendaktepa lir ta bilemer. Item sen tailatem joko mapang tatsüka Mankachar ajanga Bangladesh nungi belener. Item taila sentem bendangtsü asoshi kanga tasak lir, kechiyong nükpokertem atema ‘3D raised elevation’ features inoka alibatem amalaa densema yanglua lir. Parnoki item sen tem prokshitsü asoshi nisung kanga longsua aliba shishilembadak inyaker,” ta SP-isa ashi.
Police-i nisung ana pua aliba ya Assam kübok Hazirhat tesem nungi Abdul Kalam aser Tura nung alir Salseng Sangma, ta jangjaogo.