Sen tamshidak anentsü atema BJP nembo metetdaktsür liasü: Kejriwal

New Delhi, November 10 (Agencies): Sen 500 aser 1000 note anentsü atema telemtetba agiba ya BJP aser par tembartem nembo hopta ka jilia metetdaktsür liasü, aser ibaji UP election agitsü aliba ajanga lir, ta tanü Delhi Chief Minister, Arvind Kejriwal-i sorkar nem tai tongloktsüogo.
Kejriwal-isa, sen 2000 note benokba ajanga ochimashi dang tali adoktsü, aser iba telemtetba ya ajanga sensakertem kongshiogo, ta ashi.
Ajisüaka Kejriwal’er Cabinet züngsem, Satyendar Jain-ibo sorkar telemtetba atema tenüngsang agüja, iba ya ajanga ochimashi aser black money nokdangtsü, ta shiogo.
Aam Aadmi Party (AAP) tongti lenir Kejriwal-i twitter ajanga, “Iba telemtetba mesangdongdang yongi hopta ka jilia parnok (BJP) aser par nisungtem nembo iba telemtetba metetdaktsür liasü, aser iba indangji kulitem lir. Parnoki kiojen mesüra hon alitsü maparen renemer liasü. BJP-i Uttar Pradesh aser tanga state tem assembly election nung tokteptsü temelung nung yur ibaji inyak,” ta ashi.
“Iba ya ajanga sensakertemi dang timtem ajurudar. Ni nisung aika den jembiogo, aser parnoki kü dang ochimashi sen alirtemi pei teinyaktsü ajak inyakogo, ta shiogo. Sen shilem 15 nungi 20 tashi commission agüja senji parnok ket atongtsü,” ta Kejriwal-isa ashi.