Sen tamshidak anentsüba ajanga Rahul, Mamata ayip majanger: BJP

Bengaluru, November 27 (Agencies): Deobarnü BJP Tir, Amit Shah-i, Ato kilonser, Narendra Modi-i sen tamshidak anentsüba ajanga opposition lenir- Rahul Gandhi aser Mamata Banerjee nunger ayip majanger, ta ashi.
Tanü Bengaluru nung ‘Other Backward Classes’ sentong nung jembidang BJP tongti, Amit Shah-i, “Medemertem, melungjang yirua alirtemji black money ajanga takoksa angurtem lir. Sen tamshidak anentsüba ajanga Congress lenir Rahul Gandhi, Mamata (TMC), Arvind Kejriwal (AAP) nunger aonung amoi mouteter, parnok tejak nunga sentsü samaogo,” ta ashi.
“Nov. 7 nü tashi opposition party tem- BSP, SP aser Congress den Mamata, Kejriwal nunger ama lenirtemi Modi-i black money bener arutsü atema tasüngdangba kaa liasü, ajisüaka November 8 ayaterm nungibo parnok o melenogo aser pai kechiba ya (sen anentsüba) inyaker ta asüngdanger,” ta Shah-i ashi.
Centre telemtetba anema longkak aittsü atema opposition party tem longjemba aija Shah-i, “Tzümetsüng tensa ka mesüka lir, kong koya ka, danü ka, neol ka aser per ka ta parnok ajaki tzüsem nungi kümzüktsü atema tiyong nung aliba süngdong kati atur,” ta paisa ashi.
“Ano jangratemtsü kaji- neol aser danü jagi per aser koyaji machir. Modi-i ochimashi aser black money atema raraba anema parnok ajak longjemogo,” ta paisa shisem.