Sen tamshidak manentsüdang BJP lenirtemi kiojen ali: Cong

New Delhi, November 25 (Agencies): Ato kilonser, Narendra Modi maneni aija tanü Congress-i, sen tamshidak anentsütsü atema telemtet agiba miim osang telung nung prokba ajanga BJP lenirtemi jelia parnok indang black money agi ali aser kiojen balala ali, ta metetdaktsü.
Hokolbarnü Lok Sabha nung Congress lenir, Mallikarjun Kharge-i Ato kilonseri par party nung alirtem kar dang iba osang prok, iba sülen parnoki black money agi kiojen den tanga oset balala lir, ta ashi.
Parliament kima osangbenertem den jembidang Kharge-i, “Iba ya ajanga black money pusemertem sayur,” ta ashi.
Kharge-isa, democracy ji o lemtepba ajanga inyaker, anungji Ato kilonseri democracy inyakyim nung amangra Parliament nung iba onük nung o toktepdak pai adentsüla, ta ashi.
“Ato kilonseri democracy nung tamang kara pai Parliament-i arua o toktepba nung adentsüla aser opposition-i asüngdangbatem langzütsüla,” ta Congress lenirisa ashi.
“Nai (Modi) na ‘samrat’ (chuba) ka ama bilemer aser linük ya ‘samrat’-i tuyuba nung aoer. Kimalen mejembii nai Parliament-i arua jembitsüla,” ta Kharge-i ashi.
Sen tamshidak anentsüba ya ochimashi tulutiba lir ta shia Congress tongti otongdar, Randeep Surjewala-ia BJP lenirtem dang iba telemtetba telung nung prokba atema Ato kilonser nem tai tongloktsü.
Congress-isa, November 8 jakdang Bihar nung BJP lenirtemi sen crore 3.41 indang kimong 8 aliba indang metetdaktsü.
Surjewala den Congress otongdar Rajiv Gowda aser Sushmita Dev nungeri, sen anentsüba sangdong magütsüdang BJP lenirtemi pei account nung black money deposit süogo, aser tang parnoki ali aliba osang jungkai adoker, ta aitsü.
“Modi-i black money anema raraba tejak jungkai adokogo. India nüburtem aser Parliament ashioktsüba anener tanüdangtsü nung reprangdangang. BJP accounts ajak yimjak nung metetdakjang aser tesüiba küm ka nung BJP lenirtemi kiojen aliba osang metetdakjang, ibaji ajanga sen tamshidak anentsüba ochimashi jungkai adoktsü,” ta Surjewala-isa ashi.
“Sen tamshidak anentsüba ya ochimashi tulutiba ka kümdar, aser iba ya JPC-i bushisüngdangtsü nüngdak,” ta paisa shisem.
Congress otongdar Sushmita-ia, “Ali aliba tezüngzüktep indangji Ato kilonseri Parliament nung rasaa ashitsü ta onoki imlar. Ali aliba ya Bihar nung dang masü saka India tesem ajaklen lir, iba ya ajanga BJP ya ochimashi party ka lir ta sayur,” ta ashi.
Laisa, “Black money ya sensakertem ket nung rizünga mali ta Modi-i meteta dang lir. Tanü Bihar Assembly nung BJP züngsem kati jungkai adoktsüba ajanga black money shilem 6 nung BJP-a shilem lir ta kuli sayuogo,” ta metetdaktsü.