Senden amentsü atema Pakistan-i mepishia mali: India

New Delhi, November 30 (Agencies): Pakistan Foreign Advisor, Sartaj Aziz-i India semdangtsü anogo ana dang lia tanü India-i, linük ana senden amentsü atema Pakistan tsütsülen nungi temepishiba kecha mali, ta metetdaktsü.
“Linük ana senden amentsü atema tang tashi nungbo Pakistan-i mepishia mali,” ta Ministry of External Affairs nung Pakistan den inyakba division tongti, Gopal Baglay-i metetdaktsü.
Pakistan Ato kilonser, Nawaz Sharif’er Foreign Policy Advisor, Sartaj Aziz Heart of Asia Conference nung adentsü atema December 3 nü Amritsar, Punjab-i arutsü.
Heart of Asia Conference nung Ato kilonser, Narendra Modi aser Afghanistan Tir, Ashraf Ghani nati jembitsü; iba senden nung linük 40 dak temai shilem agitsü.
Yaküm December ita nung Comprehensive Bilateral Dialogue sangdongba sülen linük ana tsüngda temaba jenjang nung senden makateti arur.
Taküm January ita nung Pakistan nungi kiralongrartemi Pathankot amakba aser September ita nung kiralongrartemi Jammu & Kashmir, Uri jila nung army camp ka amaka sülen India aser Pakistan na tesentaktep kanga mejungi akum. Uri amakdang kiralongrartemi sepai 19 tashi tepseta liasü.
Tawa India-ia Pakistan nung ayonga aliba SAARC senden thinenja liasü.