Senden jateptsüang tasakba !

India government den Naga yimten tebilemtsü latettsü asoshi jembiba maparen nung Nagaland state government nung yimsüsürtemi akok tashi yariteptsü nangzüka lir. Atangji, Naga nunger yimten nüchiso bushiba mapa o India kübok aliba Nagaland state na ya meputeper, ajisüaka tangatettep ka nung yaritepa bushitsübaji kanga nüngdaka akümer. Ibayongji, Nagaland state government-ia mapang shia Naga yimten tebilemtsü dak aketba ken o jembitsü asoshi luden balaka shima senden jateper. Ibaji atema, tanüa state government-i kasa tebilemtsü onük benoka jembitsü asoshi Political Affairs Committee senden ka Kohima nung jatepa lir. Iba senden nung adentsü asoshi yimten yimsüsürtem den Nagaland nung alir Naga kin shia nungi mendenpurtem jaoka lir. Ajisüaka, iba senden nung NPF telok nungi tatar yimsüsürtem aser Zeliang kin nungi lenirtem medentettsüba osang metetdaktsüogo. Parnok ajakji mazüngmatuba agi masü saka senden jatepertemi tim yimya nung mejatepba agi medentetter ta metetdakja lir. Nagaland nung yimsüsürtem den Naga kin shia nungi lenirtem adenshia Naga yimten tebilemtsü ken o benoka jembitsü asoshi jatepba nükjidong ya, Naga nunger ajak longjemer telemtetba tajung ka bushitsü asoshi lir. Ano, Naga nunger asoshi tebilemtsü talila kaji, Naga nunger yimten nüchiso bushir telok balala aika kümadoba ya asünungji, telemtetba kati arutsü atema, tamasa telok ajak ka küma melongjemtetaka kenbang obangbo medemtsüla. Iba atemaji Naga nunger tarutsü asoshi bilemer lenir aikati kanga süoki ia inyakdagi aser Nagaland government-ia tang amai mapang shia Naga kintem nungi lenirtem ayongdena senden alibaji Naga kintem ajak kenbang obang ka ser India government dang tebilemba kabaso metetdaktsüner asütsü. Ajak tia ajung, tangbo yimjung nung alinungji India sepaitem o Naga nunger sepaitem na metsükchiteper, anungji nübortema tetsübu mali sademsadema alir. Joko, ajaki Naga yimten tebilemtsü ya yaktasa latetdaktsüner aser India government-ia yaktasa latettsüsa ken o tatembangleni arudagi ta mapang mapang shia metetdaktsür. Ajisüaka, akhidang nungi Naga nunger yimten nüchiso asüngbosa angutsü amai metetdakja aruba tanü tashi asüng anogo to matong teimla nung dang arudagi. Tanga yamaji jembir, ajisüaka tejembirtemi jembiyonga nübortemi telemtetbaji mulungsua agizüktsü renema melira kodanga telemtetbaji marutsü. Telemtetba agitettsü aser agizüktsü atemaji Naga nunger mulungjang longjemtsüla. Naga nunger shisatsü dang longjemra aser tangatetba ka nung kenbang obang medemra, Naga nunger yimten nüchiso manguyonga aser Naga kin ajak yimten yimsüsüba ka kübok bener maitetyonga, Naga nunger asoshi tang tensa kechi tajungtiba aser kechi shitak ta bilemdanga agizüktsübaji tasakbo masütsü. Ajisüaka, tang amai Nagaland nung Naga nunger asoshi ken o benoka jembitsü atema senden jateptsüang tasakba kümra, oagi Delhi nung Naga nunger ajak sabang ka nung külemi mener India government den jembitsübajiang tasakba akümtsü. Alima nung nisung shingaia mapa ajak nung tetibo shitak aser abensaa meinyaktettsü, anungji aiben lenirtemi mesüra külem züngsem purtemi telok ajungtsü atema peisasa angatetter kechi tajung aser kechi shitak, itemji benteta inyaka aotsüla. Tangbo Nagaland tatar senden nung tatartem rongnung opposition purtema longsulongsua lir, anungji government nung alirtemi parnok den shisalemsatepa telemtetba agitsübaji nüngdak adoker. Iba amaji, kodang Ruling nung alirtem o Opposition nung alir tatar yimsüsürtem na külemi mener Naga yimten tebilemtsü ya teti asoshi tatembang küma lemtettsü atema shisatsü lemsateptetdir, idangjiang Naga yimten tebilemtsü ya koktettsü. Iba tangatetba nung government nung alirtemia Opposition nung alir külem tatar züngsemtem akümtsübua senden mayongzük dangyongi parnok den shisalemsateptsüla. Iba kasaji opposition nung alirtemia mapa ajak nung government anemtsü dang bilema melii, Naga nunger asoshi tajung ka jembitsü aser inyaktsü atemabo aremzüktepa inyaktsüla. Iba jagi dang Naga yimten tebilemtsü latettettsü aser latetter külena timtem lendong mataloktsü.