Senden junga katettsü asoshi Cong den jembitsü melunga lir: Sorkar

New Delhi, July 31 (Agencies): Lok Sabha Speaker-i party ajak senden ka ayongba takok ngua magitetba sülen tanü Centre sorkari, Parliament senden junga katettsü asoshi Congress den jembitsü melunga lir, aser iba atema tekaraba nung senden ka ayongtsü, ta metetdaktsü.

Yashi party ajak senden amenba mapang sorkari senden ka ayongtsü temaitsü sayua liasü.

“Sorkari ketdangsütsüla ta yashi party ajak senden ka amenba mapang party ajaki melungtepogo,” ta Union Minister Rajiv Pratap Rudy-i ashi.

“Tanep sorkari Congress ajurua jembitsü sentong liasü saka CPP-i Congress lenirtem ajuruba ajanga parnok mazüngi liasü. Congress züngsemtem azünga aliba mapang onoki tekaraba nung jembitsü,” ta paisa ashi.

Pai ashiba agi, Union Home Minister Rajnath Singh-i kiralongrartemi Gurdaspur amakba sangdong ka agüja National Security onük benokba mapang Congress-i ibaji jembitsü memelungi liasü, aser ibaji tebilemtsü ka lir.

Parliament senden tenzükba anogo nungi Opposition party temi External Affairs Minister Sushma Swaraj, Madhya Pradesh aser Rajasthan chief minister- Shivraj Singh Chouhan aser Vasundhara Raje nunger parnok menden nungi aludaktsütsüla ta khanga arudagi.

Lok Sabha nung Congress lenir Mallikarjun Kharge-i, par party-i Modigate ochimashi ken o nung densema alir ajak minister menden nungi aludaktsüner, ta shiogo.

Menden nungi aludaktsütsü inyakyim ya BJP opposition nung aliba mapang parnoki tenzüka toktsü, ta paisa ashi.

“Menden nungi matsüngba tashi o lemtep makatsü. Onok takhangbaji ibaji lir,” ta Congress leniri ashi.

“Parliament ketdangsütsüji sorkar teinyaktsü lir. Iba ya tang mezüng ataloker masü. Ajak asoshi menden nungi alutsü akhangba inyakyim ya BJP-i tenzüka toktsü aser tanübo parnoki, Congress-i tetsükdaktsü bener arutsür ta jembir. Iba ya ochi o lir ta ajaki meteta lir. Iba yongji parnoki onok nem tai tongloktsür. Iba ya tim masü,” ta Lok Sabha nung Congress leniri ashi.

Tan senden ya July 21 nü tenzüka liasü saka Parliament House anaprong nung senden junga magiteti arudagi.

Tan mongpu senden nung Land Bill, GST bill aser Real Estate Bill ama tongtibang onük aika lemtepa agizüktsü sentong lir.