Senior National Basketball Championship nung Nagaland-i shilem agitsü

Luchii 20, 2018 nü Kohima nung Nagaland Senior Basketball Team den NBA ketdangsertem taruba Senior National Championship atema training agiba mapang tangokba noksa nung angur. 

Dimapur, Luchii/Dec. 21 (TYO): Aenjeti/January 2019 nung Nagaland team ya Senior National Basketball Championship nung mezüngbuba shilem agitsü renemshiba mapang lir. Nagaland nungi tebur basketball asayartem ya tang Kohima nung training agiba mapang ka lir aser parnoki Bhavnagar, Gujarat nung Aenjeti/January 5 nungi 12, 2019 anogotem nung agitsü aliba tetsür aser tebur atema 69buba Senior National Basketball Championship nung shilem agitsü. Iba asayamung ya Basketball Federation of India (BFI) ajanga ayongba lir aser Gujarat State Basketball Association ajanga host asütsü.
Nagaland Basketball Association ajanga state tenüng nung Mongputeni/October 2017 nung Didwana, Rajasthan nung Sub-Junior National nunga takok ngua shilem agiogo aser Monupii/May 2018 nunga Ludhiana, Punjab nung Junior National asayamung nunga shilem agia liasü.
Senior National Championship nung shilem agitsü aliba ajanga Nagaland nung saisapong jangrartem tali ajungmesotsü.
NBA Honorary Secretary Teisozhavi Theünuo-i sangdong ka ajanga ashiba agi, iba asayamung asoshi trial selection ka ajanga state tenüng nung asayatsü asayar parnok 12 shimtetogo. Asayartem rongnung state kübok asayamung balala akoker aser “Most Valuable Player” tem densema lir. Kasa telok nungi asayar anati taoba küm national championship nung tanga state tenüng nung asayadanga lir.
Thejangulie Mekro, shiba tang Europe Basketball Academy, Barcelona nung training tagidak lir, pai iba asayamung nung junga asayatsü imlar. Tang shimteta aliba asayartem ya Technical Director, NBA, Medozhatuo Rutsa lennisüba kübok kanga meranga training agitar. Iba asayamung nung Team Manager Thinuoneilhoulie John aser Team Coach Medohu Rutsa nati anir oa shilem agitsü.
Nagaland ya iba asayamung nung Group B nungi asayatsü. Yaoba küm iba asayamung nung Tamil Nadu-i mezüng jenjang nguteta lir aser Services puri tanabuba jenjang nguteta lir.