Senotsü timtem majurui temang anepalutettsüla: PB Acharya

Kohima, Rongchii (April) 7 (TYO): Nagaland Governor PB Acharya-i Küptoknü (Honibar) state health & family welfare department aser private health care centre ajak dang pei tajungtiba agi nübortem yaritsü aser universal health coverage nung temulung agütsütsü atema ayongzük.
“Nübortemi medical teyari agidang senotsü timtem majurudaktsütsüla” ta Acharya-i World Health Day onük jembidang ashi.
World Health Day ya alima nung Rongchii (April) 7 nü amunger aser taküm ya küm 70 buba amunger. Taküm atema omenji “Universal Health Coverage: Everyone, Everywhere” lir ta paisa metetdaktsü.
“Asenoki Universal Health Coverage nung temulung agütsütsüla aser senotsü khuret kecha majurui health services agütsütsü atema asenoki merangtsüla” ta Acharya-isa shisem.