Senpak 100/50 magientsü: Sorkar

New Delhi, November 27 (Agencies): Sorkari senpak 100 aser 50 anentsü tebilemba mali ta Deobarnü metetdaktsü.
“Demonetization Myths Busted” ta ser kaket tila ka adokba nung Prime Minister Narendra Modi-i kobi melii senpak 100 aser 50 anenba osang metetdaktsütsü ta jembibaji khenyongi tiyazü ta sorkari zülua lir.
Sorkari senpak 500 aser 1000 anentsüba osang corporate house kar aser party züngsemtem dang jelia metetdakja liasü ta jembibajia tiyazü, ta sorkari adokba kaket nungsa shia lir.
“Iba mapa inyaktsü atema sentong atongbaji kanga junga miimbanger inyak aser sorkari shinga nema osang jelia memetetdaktsü” ta “Demonetization Myths Busted” kaket nungsa zülua lir.
Ozüng alema sen miima bendena ayurtem metettsü atema sen tasenba nung ‘chips’ enoka lir ta jembibajia tiyazü, ta sorkarisa metetdaktsü.
Senpak 2000 tasen menüngba ya jenjang tamajung aser sen indang sentsüh alur ta jembiba atema sorkarisa ashiba agi, “sen tasenba nung sü agi aishidang ‘turbo-electric effect’ adokdaktsür aser idangji sü nung sen indang sentsü nüloker. Iba ya security feature ka lir aser intaglio printing ta ajar.”