Senpak 50 notes tasen adoktsü: RBI

New Delhi, August 19 (Agencies): Kobi melii Reserve Bank of India (RBI)-i Mahatma Gandhi series nung ‘fluorescent blue’ sentsü nung senpak 50 notes menünga adoktsü, aser iba senji tang aliba senpak 50 note dang nungi tera tilaba aser tapuba asütsü; ajisüaka senpak 50 note tejenbajia tagila asütsü.
Senpak 50 note tasenbaji tasazük 66mm x 135mm asütsü; metong tasazükji senpak 500 aser senpak 2,000 tasenba den kasa asütsü, saka lenden nungbo senpak 500 dang tilaba asütsü.
Senpak 50 tasenba notes tesülen kor talungtsü noksa den Swachh Bharat logo keta lir.
RBI-i sangdong ka ajanga, senpak 50 notes tasenba nungji security tasen lir, ta metetdaktsü.
Senpak 50 notes tasenba nungjisa micro letters ‘RBI’, ‘Bharat’ (Devnagri oshi nung), ‘INDIA’ aser ’50’ zülua lir.
Banknote nungji windowed demetalised security thread nung ‘Bharat’ (in Devnagri) aser ‘RBI’ zülua lir.
Ajisüaka sen denomination kasa nung (sen 50) tasazük balala asübaji ajanga ATMs nungi sen agizükdang timtem adoktsü südi ta bilemer.
“Ibaji tebilemtsü ka masü, kechiyong bank aikati ATMs nung senpak 50 tejenba notes magütsür,” ta NCR India CEO, Navroze Dastur-i metetdaktsü.
“ATMs nungi senpak 50 notes agütsütsüsa süra senpak note tasenba aser tejenba atema cassettes balala alitsü,” ta Dastur-isa shisem.