Sensak tia nungi nüchiso !

Tang India nung kaketshirtemi yimyim tasen ka ayimtsü tenzükogo, ibaji sensak tia nungi nüchiso, ochimashi mapatem nungi nüchiso aser tajemrep tia nungi nüchiso aginür ta ayimba yimyim ya asütsü. Iba yimyim ya Jawaharlal Nehru University Students’ Union nung tir Kanhaiya Kumar-i kaketshirtem senden nung ayim tenzükba yimyim ka lir. Tawa February 9 nü parnok university nung küm ishika jakdang kiralongrartemi parliament amakba maparen nung nisung ka tenüng agi Afzal Guru alenseta südaktsüba bilemteta amongba senden nung jembidang Kumar-i iba Yimyim ya ayima liasü. Atangji, iba senden ayongertemi Afzal Guru alenseta südaktsüba obendang aija jembir, anungji sorkari parnokji kiralongrar pusemer ama agir. Iba senden nung India anema yimyim ayimogo ta aija Delhi policetemi Kanhaiya Kumar pur tepuokdak hopta asem ayuba sülen yakanü pa ita trok atema bail nung chioka lir. Pa tepuokdak nungi alur yakonung parnok university nung kaketshirtem noklang aika adenshia alidak jembidang, ” ni India nungi nüchiso aginür masü saka India nung nüchiso aginür,” ta metetdaktsü. Aji oda, India nungi nüchiso aginüba o India nung nüchiso aginüba naji tetezü aser tetsüngda talangka itepba lir. Delhi police-i Kanhaiya Kumar-i India nungi nüchiso aginür ta ayimten ta aija apu saka pai India nungi masü, India nung sensak tia nungi, ochimashiba mapatem nungi, tashimaitertem ajemzüka yutsüba tia nungi nüchiso aginür ta ayimten. Iba ayimtenba kuliji parnok senden nung jembidang tangokba video nungi metetter. Atangji, Kanhaiya Kumar aser par teloki BJP telok anemer aser Narendra Modi leniba maginer. Ibayongji, parnoki BJP sorkar yimsüsüba anema jembir. Aji oda, yakonunga Kanhaiya Kumar tepuokdak nungi aluli parnok kaketshir medemertem den jembidang, pai Narendra Modi aser BJP sorkar mapatem aija jembia liasü. Kanhaiya Kumar ya Bihar nungi sensaker kibong ka nungi aruba jabaso ka lir, anungji pai linük nung sensaker ayatzüraba timtem indang kanga junga meteta lir. Iba jagi pai linük tenzükba mapa nung kiralongrartem ket nung sepaitem asüba o ayaba agi aser sentsü maotetba agi aluyimer sensakertem asüba na timtem aser takoksa tia medemdanga jembia liasü. Atangji, bendanger yimsüsüba ket nungi India-bo nüjiso nguogo saka India nungerbo nüjiso mangu alar tia nung lir. Anogo nung chi anaben tebok sünga mechiyongtetba India nunger kibongtem, ki talidak maka kima yimdong nung lia senzüba India nunger kibongtem, tanurtem school-i meyoktetba India nunger kibongtem, shirangba mapang mozü süngjang kata malitetba India nunger kibongtem, takar dang sendem nung sen apur aluyimertem sentsü maotet shisabolua peisasa alenseta asüba India nunger kibongtem aika tajemrep tia nung nisunga masü aser shirurua masü ta asüba taküm tia nung lir. Item jagi  India nung nüshi senso ka ama akümketa lir. Item atemaji nüchiso nüngdakba indang Jawaharlal Nehru University nung Kanhaiyai anir kaketshirtemi linük nung yimyim tuluka ayim tenzükogo. Atangji, iba yimyim jagi BJP sorkar tipmedemi kümdaktsüogo. Ajisüaka, tang amai BJP sorkari parnok anema jembir aser parnok mapa aitsürtem dang maremzüki ajak tepuokdak ayutsü merangra akhidang Indira Gandhi mapang linük nung emergency agütsüba tensa tia dang nungi tamajungba asütsü. India ya democratic aser secular lima, anungji nübortemi mulungba inyaktsü, jembitsü aser amangnütsü amangtsü temeten agüja lir. Iba ama lima ka nung yimten takok ngua bener aotsü asoshi taremzük aser tangatetba nüngdaker. Aji oda, Kanhaiyi ashi ama, yimten aser lokti nung tangatetba aser tebilemba balala asüba agi shingaia shinga tsükchir ama mebilemtsüla aser yimten lenirtemi nübortem nüchiso nüngdakba tiaji tonga orr reprangdangtsüla aser nüchi kümtsütsüla.