Sensaker atema inyaktsüji Centre, state arok khuret

New Delhi, August 27 (Agencies): Tanü Honibarnü BJP National Tir, Amit Shah-i party Chief Minister tem dang peipei state nung Centre sorkari sensakertem atema benokba mapatongtem junga inyaktsü aser junga yimsüsütsü ajungshiogo.
Party-i linük litsü shilem 51 aser nütsüng shilem 37 madak yimsüsür, ta shia Amit Shah-i, “Modi’er sorkari benokba mapatongtem takok angutsü atema state temi tongtibang shilem agitettsü, kechiyong Centre sorkari benokba scheme 80 rongnungi scheme 65 bo state temi inyaktsüla,” ta metetdaktsü.
Tanü New Delhi nung BJP nungi Chief Minister tem, Deputy chief minister tem aser state balala nungi party Tir tem senden nung pai item o jembia liasü.
Iba senden nung Ato kilonser, Narendra Modi-a dena liasü.
2014 küm May ita Centre nung BJP-i aniba sorkar tashii aruba sülen ibala mesükba senden yabo tanü mezüng amener asütsü.
Linük nung Dalit nunger aser tamangba yimsü nung minority tem anema inyakba tatalokbatem atema opposition party temi sorkar aitsüba mapang ka nung party bangdak lenirtemi sensaker tem indang welfare scheme balala junga inyaktsü atema state tem dang tuyuogo.
“Linük nung BJP-i mapa inyakba yimtenren ka tenzükogo. Mapa junga inyakba nung ajemdaker state tem nung mapangmapang shia BJP sorkar shimmer. Sensakertem atema inyakba state ka yangertsü aser sensakertem taküm jenjang tajungba kumdaktsütsüji Centre aser state sorkartem arok khuret lir,” ta Shah-i ashi.
Tanü iba senden nung Rajasthan Chief Minister, Vasundhara Raje dak alaka party Chief minister tem ajak aden, ajisüaka la melen senior minister tem iba senden nung denogo.