Sensakertem atema sorkari ki crore 2.95 yanglutsütsü: Centre

New Delhi, March 23 (Agencies): Bodhbarnü Centre sorkari, India yimtsüngtem nung sensakertemi ki crore 2.95 yangluba nung sorkari senotsü agi yaritsü aser iba atemaji ki malir kibong shia nem senotsü teyari lakh 1.30 tashi agütsütsü, ta sangdongogo.

Communications & IT Union Minister, Ravi Shankar Prasad-i, “Bodhbarnü yangi (New Delhi) Ato kilonser, Narendra Modi leniba nung senden amendang Cabinet-i agiba telemtetba ya tongtibang telemtetba ka lir,” ta ashi.

Pai ashiba agi, tesütiba census nung apir ki crore 2,95 yanglutsü nüngdaker aser iba nükjidongji India nunger nüjiso ngur küm 75 ajungba benjungmung küm- 2022 tashi nungbo ataloktsü.

“Housing for All” scheme kübok lenden lima nung alir sensaker kibong shia sen lakh 1.20 teyari angutsü aser tenemlen aser tesem tamajung nung alir sensaker kibong shia sen lakh 1.30 angutsü, ta minister-isa metetdaktsü.

Delhi nung osangbenertem den jembidang Ravi Shankar Prasad-i, “Iba programme ya küm 6-7 inyaktsü,” ta ashi.

Mezüngbuba küm asem nung ki crore 1 yanglutsü sorkari benokogo, aser iba nungji sorkari sen crore 82,000 jungnüa intoktsü, ta paisa metetdaktsü.

“Item rongnungjagi sen crore 65,000 ji budget nungi aser tanüngba senji India’er development bank tongti, NABARD nungi intoktsü,” ta Prasad-isa shisem.