Sensakertem meimba nisung

Akümlirtem rongnung lenir mesüra adianu ka alima nungi pilaa aodang jashir aser menungraa bilemer. Ajisüaka, akümlirtem rongnungsa süaka kodang nübortem meimba aser sensakertem yariba tulur aser takar nisung ka südir, idangjibo jashia menungrabaji dang masü saka shisabolua bilemer, kechiyong nüngdakba purtem ajak asoshi teyarir tajung ka mali akümer. Iba amaji tanü Naga nunger takartem rongnung ka, Wabong Yashitsüngba iba lima nungi piladang, kija kibongtem dang masü saka lokti tentet aika tejenokdak aser nüngdak nung teyari meshitak maka shisabolu mapang ka agi tongogo. Tanü takar aser tulurtem ya kenübo parnok mesüra parnok tsüraburtembo sensaker aser makamaiter asüba kibongtem nungi adokba purtem lir. Item takar aser tulurtem rongnung aikati taoba mapang parnok mesüra parnok tsüraburtem timtema intetba anogotem amadoker aser kodanga mesensakdang amato ngasangatema alir aser sensakertem anasaia marudaktsür. Itemji alima nung tia makaba purtem asütsü. Tebu tedi asür Yashitsüngbaibo pa nem moatsüba rongsentemji pa kija agitsü moatsüba rongsen masü saka sensaker aser nüngdakbapurtem den lemsateptsü asoshi moatsüba rongsen ta angateta liasü. Ibayongji, pai aiben ‘ni ya kü nem moatsüba rongsen madak kibur masü saka ketdangser ka dang lir,’ ta shia liasü. Iba amaji akümli nung nisung kar takar akümtsüsa moatsüba rongsentemji par kija atema masü saka makaba purtem den lemsateptsü asoshi Tsüngremi moatsür ta angatettsüla. Iba amaji kodang angatetdir, takar aser tulurtemsa tepelaba alitsü. Asür tsürabur Yashitsüngbai ali rongsen aika benden, saka itemji pa kija agitsü atema masü saka nüngdakba purtem den lemsateptsü asoshi bilema inyaka liasü. Iba amaji tanüa lanurtemi akok tashi rongsen poktetdakja yanglutsüla aser nübortem anisüngzükdaktsütsüla. Tanübo tejashitsü kaji, asenok aikati nüngdakba purtem yaritsü asoshi masü saka pei kija takar akümtsü bilema rongsen bendener. Idangjibo, sensakertem yaritsü melena sensakertem meyongang miimzüka agitsür. Iba jagi sensakertem taneptsü angudak maka aser makamaitertem kaketshisatsü angazükdak mali timtemba tia ajangshir. Ibaji reprangteta tebu tedi Yashitsüngbai Dimapur nung mozü ki tajung ana yanglutsüogo. Atangji, par mozü kidanga angatibo teyari mangur saka bendanglen shiranger bener jajadang timtemba dang nungibo timmatemba aser senotsü endokba dang nungibo kanga agia tajemba endoker. Iba denji ano kanga sensaker aser makamaitertem dangbo item mozü kidangji teyari angatia angur. Wb. Yashitsüngba dak tajung kaji pai pa lanuwa sensakba aser timatemba kodanga mamadok aser kodang pai kar timtema ngudir kanga aria bilema yari. Pai par chirtema medical doctor kümdaktsü. Kodang par jabaso Watiba government hospital nung doctor aküm, pai Dr. Watiba dang pa ita sen kidangi bener marui mozü kidang mozü malitettsüsa shirangertem yaritsü tangatetba agütsü. Tebui ashiba amaji, Dr. Watiba Dimapur nung government mozü kidang inyak piyong pa ita sen agi makamaitertem yari aser pa nüngdakjibo tebui agütsü. Item tatalokba otsütemji kodang asenoki bilemdangdir, Nagaland nung takar ajunga ya Yashitsüngba amato asü nungbo kanga jungla ta bilemer. Pei ita sen agi makamaitertem yaritsüsa takar aser tulur chirnurtem Nagaland nung ano kar lilasang, Nagaland nung sensakertem tanü ajuruba amaibo maksü ajurua timmetemla ta bilemer. Shirangersa süaka nisung karbo sen meyirijang aika jenjang yipten nung mejanger anepaludaktsür saka karbo yiptena maka aser mozü alitsüa senjang kata maka akseta government mozü kidang teimla maka tejak ashireper asenoki aiben ajurutsü. Wb. Yashitsüngba dak tazüngba degree mali asü saka nübortem asoshi nüngdak mapa tajung inyaktsütsübo mangdang tulu liasü. Iba mangdangji pai mapa küma inyaktetogo. Tanü iba ama temeim aketba nisung ka alima nung kanga junga arishi talangka lir pilaa aodangbo, jashitsü melen, pa ama alima nung temeim mapa tajung inyaka linüali ta nükshia bilemer. Atangji, tanü asenok den Yashitsüngbabo mali saka pai inyakba mapa tajungtem agibo asenok ano aiben anisüngzük angutsü.