Sensaktia anema raraba nung scientist temi yaritsüla: Modi

New Delhi, November 06 (Agencies): Deobarnü Ato kilonser, Narendra Modi-i scientist tem dang ayatzüra aser chiyungtsü agi matuba tebilemtsü atema nenoki lenmang bushitsüla, ta ashi.
Tang mezüngbuba International Agrobiodiversity Congress (IAC) senden nung jembidang Ato kilonser Modi-i, “Tanü nisung million aika ayatzüra, sensaktia aser chiyungtsü agi meperiba agi timtemdar. Item tayongzükba anema raraba nung Science & technology-i tongtibang shilem agitsüsa lir,” ta ayongzük.
“Asenoki item tayongzükbatem atema lenmang bushidang sustainable development aser bio-diversity wazüka ayubaa mesendoktsüla,” ta paisa ashi.
Bio-diversity wazüka ayutsü onük nung Modi-i, International tentet, linük tentet aser nija tentettemi takok angutsü atema osangtsüsang lemsatepba den külemi longjemer inyaktsüla aser iba atema o lemtepa nükjidong ayutsüla, ta ashi.
Indian Society of Plant Genetic Resources (ISPGR) aser Bioversity International nati senteper Indian Council of Agricultural Research den külemi New Delhi nung November 6-9 anogotem nung iba sentong ayongzüka kadar.