Senso ajaki GST saru inyakyim meteta alitsüla: M. Patton

Dimapur, October 26 (TYO): October 23, 2017 nü Department of Taxes-i Zunheboto district kübok business stakeholders den Goods and Services Tax (GST) dak sendakba nung shisalemsatepa liasü.
Iba sentong nung Inspector, Myingthungbemo Patton-i stakeholders dang, senchi mechidaktsütsü atema July, August aser September itatem indang GST filing asütsüla, ta metetdaktsü.
Pughoboto, Satakha, Atoizu aser tanga sub-divisions nung Goods and Service providers ajungshia department-i parnok dang tasüngdangnüba balala aser metetpelatsü atema parnok den tongteprateptsü metetdaktsü.
Myingthungbemo Patton-isa, GST ajanga timtem adoka customers mesüra nüburtem kongshira, iba timtem khuretji Goods and Services Providers-ia kasa lemsateptsüla, anungji GST junga benoktettsü atema stakeholders ajaki khuret agia inyaktsüla, ta ashi.
“GST inyakyim ya alitsüsa, anungji senso ajaki pei sasep nung GST indang inyakyim rajema alitsüla,” ta paisa metetdaktsü.