Senso ajaki kasa temeten aser maongka agitsüla: PB Acharya

Kohima, Tsüklai 02 (TYO): Tsüklai 1, 2018 nü Mon district kübok Wangti yim anasa Mount Langshai Campus nung Minority Indigenous Community indang 15buba Session Pongvin Mozu Moyong (benjung) nung Nagaland Angh, P.B. Acharya-i, India sensotemi kasa temeten aser maongkatem agitsüla, ta ashi, ta tanü PRO, Raj Bhavan sangdong ka nung metetdaktsü.
Iba sentong nung tongti tesemdanger o jembidang pai, India ya democratic aser secular linük ka lir, aser lokti telemsa balala akhümtsübutepa alir, ta metetdaktsü.
“Senso ajaki electricity, tajemtsü tzü, school, hospital, gari lenmang tesendaktep maongka agitsüla,” ta shia pai nüburtemi ajangshiba tebilemtsütem reprangtsü, aser tim ketdangsertem den jembitsü, ta metetdaktsü.
“India ya secular linük ka lir, aser secularism tashi aittsü atema ajaki inyaktsüla,” ta Nagaland Angh-isa ashi.
Paisa adenshia alirtem dang pei sobaliba wazüka ayutsüla, aser lanurtem danga ibaji sayutsüla, ta ayongzük.
“Meimchir ka tejakleni aotsü atema tamendakdakji sobaliba lir, aser tetsü oshiji asen maitsü lir,” ta pai ashi.
Kasa sentong nung Wangti Village Council Chairman, Pongthra Angh aser taoba Assistant Commandment, VG, Chingjei natia jembia liasü.
Iba sentong ya S. Hoya leniba nung agi; Nahwang Langshai-i lokti pelaa agizükba o jembi aser Nengwang School kaketshirtemi ken ka aten.
Community & Religion Founder, Rev. Dr. N. Yahoi Konyak-i tepela anküp o jembi aser Langshai watsütemi sobaliba ken ka ajanga shilem agia liasü.