Senso candidate

Joko election mapang atongerji sangküm küm tatemlenbo yim aika senso mongdang lia senso candidate shimtsü asoshi bilemdar asütsü. Asenok Aor asoshi balaka pei yimtsüng nung sensosangertemi nisung ka pei senso candidate asütsü shimbaji shitakba election magidang election tilaka (preliminary election) agir amai lir. Iba jagi ajaki kanga süoki ia bilema shilem agir. Atangji, pei yimertem rongnung tajungtiba ka shimer pei constituency aser pei lima nem agütsütsübaji junger. Ajisüaka, asenoki metettsüba kaji election yabo yim o yim na mesüra tsükong o tsükong na tsüngda toktepba asaya ka masü saka yimten nung political party balala tsüngda yimli raktepba mapa ka lir, anungji senso candidate masü saka party candidate asütsüla. Iba kasaji Indepenent candidate-jia yim kati masü par constituency purtemi shimtsü. Ibaji asenoki angatetter mangatet ama inyakba ajanga asenok ajak yimten angatetba agi masü saka senso ta asüba agi pei angatetba telok nung adener masü saka senso telemtetba nem anishidaktsür. Iba jagi khen khen yim ajak Congress telok asütsü aser ano kasa yimji khen khenbo NPF asütsü ta yimten  tangatetba mali senso ta asüba kübok asenok ajak anishidaktsür. Iba jagi election matongdang election-i aitsü purtema sensosangertemi shimtsü aser election nunga pei vote peisasa enoktsütsü masü saka ajak tsüda sensoi dang enoktsütsü. Iba jagi akhidangbo, jajaa moutetter tantsür-tambur dena polling station-i ponger arua vote enokdaktsüba yimten yimli ronem to samaogo. Atangji, asenok yimtsüngtem nung pei yim senso candidate shimba sobaliba ya tenzüker talangkabo masü. Aji oda, senso candidate meshimdang agiba election o senso candidate shimer agiba election na tsüngda medemdangra, senso candidate mali ser election agiba mapang yangluba kiojen aser lenmangtem tanü senso candidate shimer agiba election sülen, tasen yangluloka aotsü melena itemjia junga meyanglushitetba tia ka nung asenok lir. Senso candidate mali dangbo election mapang yim o yim na meraratep aser yimtaka vote agütsüba anogoji benjong amai ajaki pelatepa shilem agia among. Ajisüaka, senso candidate shimba sülenbo sensosangertemi ballot paper mengudang, vote meinoktsüdang küm aika arur. Aji oda, party-i shimer masü sensosangertemi shimer asünungji, oagi assembly nung jembitettsü asü mejembitettsü, zülutettsü asü mezülutettsü aser amonga atena orr tangar koka inyaktettsü asü meinyaktettsü ta asüba tangatetba nung masü saka yimtak takatait aser kimang tulu tila, tama arur-tesü arur apia shimer. Iba jagi yimtakbo chuba amai saka yim süngküm atenerbo kilir asütsüa metemsü amai senzüba asenoki angutsü. Senso candidate aliba o maliba na tetsüngdaji aji lir. Atangji, yim ka dang nenok senso candidate malitsüla ta ashitsü makok, ibai parnok mulung saka senso candidate ka shima yur yimer ki ishikabo shibangtsütsüsa mesüra aridoktsüsa kümra, senso candidate maliang tajungba. Senso candidate liang teli, tanü putu nung yabo senso shiai pei vote peii enoktsüla. Iba jagiang senso akümer aser khuret metetter anungji tajangzük aser maongkaa agitetter. Küm shia lanurtem aika arishi küm 18 junger electoral roll nung züluoker saka election nung vote-bo meinoktsütetter. Iba amaji asenoki asen yimten aser loktiliba nung lanurtem mashileni anitetter. Ibaji asenok taintem asoshi taaktsüka aser tamakok tuluka asütsü. Iba amaji temulung nung tipmedemi bilemba agi taoba hopta nung asenoki ‘ Election nung asenok yimtsüngtem nung senso candidate meshim nunga koma süla ?’ ta asüba tasüngdangba nung bilemdangogo. Telangzür teimbakati yimtsüng senso candidate maliang tajungba süla ta langzüogo. Aji oda, kodang election arudir, asenok constituency ajak nung yimtsüng senso candidate masü party candidate aser constituency nungi tajungtiba shimer asenok ajak nümadangtetdangteta tatar sendeni Naga nunger tetemsü yimsüsür ka sütettsüsa yoktsü merangdi.