Senso ket nung Aadhar Card alitsüji temzüng ka masü: Nagaland sorkar

Dimapur, December 03 (TYO): Justice K.S. Puttaswamy (Rtd.) telok aser India sorkar telok na dak sentakba Writ Petition (Civil) No. 494, 2012 ken o nung Supreme Court-i taküm 2015 küm August ita 11 nü agütsüba obendang nung ajemdaker, senso ka ket nung Unique Identification Number ta ajaba Aadhaar card alitsüji temzüng ka ama mebenshitsü tetuyuba ka Nagaland sorkari tanü Brehostibar nü agütsüogo.
Nagaland sorkari tan tetuyuba agütsüba ajanga senso ka asoshi renemtsüba tajangzük balala ajangzüktsü atema Aadhaar card sayutsü menungdaki akümer.
Ajisüaka, jang aser sorochioktsü kerosene totzü alizüktsü densema, PDS Scheme aser LGP Distribution Scheme amala mapatong nungbo Aadhaar card amshitsü akok.
Unique Identification Authority of India (UIAI)-i Aadhaar card agütsüba ajanga nisung ka indang osangtsüsang angubaji PDS aser LGP District Scheme amala mapatong dak alaka, tanga nungdak kecha nung mamshitsü.
Ajisüaka, temzüng alema inyakba ken o bushisüngdangtsü atema okadaki tuyura Aadhaar card ji amshitsü akok.