Senso nungi Jendokba teshisadangtsü

– Moatemjen, Kohima
E-Mail : emchenmoa@gmail.com

Tawa Ao Senden-i ka ken, ka ken ta Aoer senso nungi nübo balala jendokba osang angashidang, kanga shisabolua aser tarutsü mapangtem nung Aoer libalirua aotsü asoshi kanga tsübuseta bilemer. Iba teinyakba ajanga tip atem benur arutsü melena tasüngdangba dang aika adokdaktsüogo. Ao Senden ya Ao kin tsüngda amalitep tajung akatsü aser Naga nunger tanga kintem dena tangatettep tajung katettsü nükjidong yur tentetba lokti ka lir. Ao kin Chungliyimti nungi tenzüka putusa putu sobaliba aser yimsüsüba koba ochi, temeten aser Aoer den tapet lokti achayangba dak ajemdaker amshia aru, ibaji, kija kar miim nükjidong ataloktsü asoshi memenentsütsüla. Anungji mapang balala nung Ao Senden telemtetbatem item sobaliba tajung dak ajemdaker agia aru. Saka tawa tanü Ao Senden inyakyim ajanga reprangtetba agi, iba lokti inyakyim ya tanü India nunger temzüng kübok aliba yimsüsüba inyakyim den aiben tsükteper.
Tetsü tebou mapang nungi Aoer yim kaji tangar dak memetaloki aliba yimtsüng yimli (sovereign village nation) ka ama inyaksangshia aruogo. Yimtsüng kübok alir sensotemi yimten tashi angatsüla aser yimten inyakyim Putu Menden-i sensotem nem angatetdaktsütsüla. Iba Aoer yimtem Putu Menden/ Samen Menchen ya Unger mesüra Tsünger-i achayanga aruer aser iba ama yimsüsübaren ya India temzüng (constitution) ajanga-a mela-a lir. Tai inyaker senso ka dak pa tai alang merenshitsü Putu Menden dak tashi lir. Item nisungtem merenshitsü asoshi kinunger mesura kidong nungi kuli ja-a merenshia aruer. Item temerenshitemji senchi, Putu mesüra iba dak sendakba mapa nungi anentsütsü, tsü-ali agientsü, nübo agi merenshitsü aser kangasa tamajung tatalokba nung züka merenshitsü, yamalasa inyaka aru. Nisung ka senso nungi jendoktsüba temerenshi yabo Aoer sobaliba-a aruba mapang tepiyong nung tang tashi züngteta dang ataloka lir. Ao Senden ya Aoer rongnung aser tangar Naga kin den telungjem aser tesendaktep tajung alitsü nukjidong nung mapa inyaktsü tongtipangba ta bilemer aser yamaji pei arok sensor ka züngsem (identity) temeden agientsüji Ao Senden temzüng nunga mali ta nibo bilemer.
Ao Senden-i Aoer senso kar Aoer nungi jendokaka, iba ya mapa küma benshia aotsü asoshi timtem aika ajurutsü amai reprangteter. Ao Senden-i sensotem aridokba osang den kulemi jenjangtem (terms and conditions) tejangja metetdaktsü nung tajungba süla. Yimtsüng ka indang Putu Mendeni par senso ka jendoker asünungbo timtem tuluka melila. Yabo sobaliba temzüng (Customary law) dak aketba mapa ka. Ano Ao Senden-i Aoer yimtsüng kaji Ao Senden kübok ta shitetra aser Aoer yimtsüng ajaki pei yimji Ao Senden dak tanglokba süngsang ka dang ta agizüktetra (nibo aji kenyongi magizükteter), Ao Senden-i dang ‘aibelensang’ er yimten nem pa aridokang ta ozüng agütsür, par yimeri aji inyaker külen tatem nung Ao Sendeni iba inyakbatemji hau ta agizüktetra, mapa tatem süla.
Kobi melii ano aiben zülutsü nüngdak adoktsü asünung tatem nung onük ka ana shia tembangnür.
1. Aoer yimtsüng balala nung inyakyim terara temelenshi alitsü akok saka tongben inyakyimbo kasa dang. Anungji Ao Senden inyakyim ya Customary law aser practices dak ajemdak asü masü, aji jungjunga angatettsüla. Kechiyong aji melaa lirabang parnok inyakyim ya Article 371 A ajanga metentsütsü. Aji mesüra lendong lir aser tarutsü mapang Aoer sobaliba tensa nung tetsübutsü tatalokba aika tenjitsü!
2. Ao Senden aser Aoer yimtsüng balala tsüngda mapang balala nung mangatettep adokba angur. Iba atalokba shia lenjii arutepa tarutsü mapang inyakyim sademtsü asoshi memunudangsa benteta ayu nung jungla. Ya bentettsü asoshi Ao Senden Federal Assembly mesüra Presidential Council senden nung dang masü saka lenla Mungdang kabosa jatepa Aoer yimtsüng ajak nungi nubo peria sendena arokaroka tebilembatem lemsateper angatettepa ayu nung tajungba asütsü.