Sensotem nem yimsüsüba tajung agutsütsüla: PM Narendra Modi

New Delhi, August 24 (Agencies): Ato kilonser, Narendra Modi-i Additional Secretaries aser Joint Secretaries 70 shi den jembidang pai, sensotem atema tongtibatibaji yimsüsüba tajung asütsüla, ta metetdaktsü.
Brihostibarnü Prime Minister`s Office (PMO)-i sangdong ka ajanga, “Bodhbarnü Ato kilonser, Narendra Modi-i sorkar tenzüker Additional Secretaries aser Joint Secretaries 70 shi ajurua senden mena jembiogo,” ta metetdaktsü.
Iba senden nung ketdangsertemisa digital aser smart governance; yimsüsüba inyakyim; teladak sorkar; aluyimertem terenlok aser senotsü jenjang; skill development; Swachh Bharat; consumers temeten balala; environment protection aser 2022 küm tashi nung India tasen ka yangertsü onüktem nung parnoki ajangshibatem lemsatep, ta sangdong nungsa shia lir.
“Linük sensotem temelung asütsü atema terenok den junga yimsüsüba nüngdak,” ta Modi-i ashi.
“Telemtetba agidang ketdangser ajaki sensakertem temelung nung yur telemtetba agitsüla,” ta Ato kilonserisa ashi.
Ato kilonseri, alimai India dang nungi tuluka imlar, ta ashi.
Modi-i ashiba agi, tang India nung sensaker aser tepetzük kibongtem nungi lanurtemi jenjang tajung ngudar.
“Tongmelang aser sensaker kibongtem nungi adokba lanurtemi saisapong aser tetoktepba tatidang balala nung jenjang tajung ngudar,” ta Modi-i ashi.
Modi-isa ketdangsertem dang item sempettem ajungkettsütsü atema inyaktsüla, iba den külemi tenzükba wadang nung mezüngbuba küm asem nung tenzüka aruba kasa tanela asentenshir inyaktsüla, ta ayongzük.
“Linük tajangzük angutsü atema iba mapang ya ketdangsertem atema maongka tajungtiba lir,” ta Ato kilonserisa metetdaktsü.