Sensotemi temeten indang jembidang teinyaktsütem shitak inyaktsüla

Kohima, January 24 (TYO): Sensotemi pei temeten atema raradang, senso ka teinyaktsü mapatem shitak inyaktsüla ta Planning and Coordination and Parliamentary Affairs Minister Neiba Kronu-i ashi.
Hokolbarnü Department of Parliamentary Affairs, Government of Nagaland-i ayongzüka agiba “Constitution and fundamental duties” shisatokden nung pai iba o jembi.
“Asenoki teti constitution nung lateta aliba asen temetentem indang jembir aser temeten ajak aginür, saka asen temeten indang dang jembibaji tim masü. Constitution nung sensotem nem agüja aliba temetentem nung asenok teinyaktsütem indang-a lateta lir. Anungji, senso tajungtem ama asenoki itemji inyaktsüla” ta Neiba Kronu-i ashi.
“Asenoki Constitution nung aliba ama inyaktsüla aser lateta aliba onüktem, National Flag aser National Anthem akhümtsübutsüla” ta paisa shisem.
“Constitution nung public kiojentem kümzüka ayutsü aser ozüng alema mapa meinyaktsü lateta lir. Constitution nunga senso ajaki arem, awatsüng, ayong aser arem shirurutem kümzüka ayutsü teinyaktsü lateta lir” ta Minister Kronu-isa ashi.
Paisa kaketshirtem dang senso ka teinyaktsü shitak inyaktsü aser iba ajanga linük temaba jenjangi ajungkettsü ta tayongzükba ka agütsü.
Iba sentong nung Secretary (Judicial) Law and Justice Department, Nino Iralu-i o jembidang “tanga state tem den liromedema Nagaland nunga November 26, 2019 nungi tenzüker küm ka piyong Fundamental Duties of the citizen indang campaign tenzük aser iba ya November 26, 2020 nü tembangtsü” ta metetdaktsü.
Iba sentong nung shisalen sayurji Senior Additional Advocate General, Gauhati High Court Kohima Bench, T B Jamir liasü aser Commissioner and Secretary for Parliamentary Affairs, Motsuthung Lotha-i tadenertem fundamental duties indang tezüngzüktep agidaktsü.