Sentep alitsü memelar

India ya tamangba yimsü ajak sademsadema sayutsü aser amangtsü akokba linük ka lir. Ibaji linük temzüngi melar. Ajisüaka, tang küm ishika tsüngda India nung Khristan-tem Hindu yimsü dangi tanaben meyipdaktsüba, Khristan-tem sentep alitsü memelaba aser asentenshi sentong agitsü nokdangba mapatem agi tesem aika nung Khristan-tem timtem reshikangshi tia ajurudagi. Asenok Nagaland nung alirtemibo Khristan-tem reshikangshiba ya tebang agidang jembir aser osangkaket nung dang azünger ashi shitakba nungbo majurudang aser majangshidang, anungji zübazübaa bilemtsü akok. Ajisüaka, tenla kidang sentep agia alidang meinzüka yokba, tenla ki raksatsüba aser Tsüngrem o jembitsü memelaba tensa tia ajurur Khristan-tem asoshibo tetsübutsüka lir. Aji oda, linük temzüngi senso shia nem pei amangnütsü amangtsü temeten agüja liaka, Hindu nungefr teloktemi India nung Yisu Khrista osang tajung mejembidaktsütsü nokdangba mapa ya Communist limatem dang nungi tamajungba aser tetsübutsü taketba kümogo. Joko, chiyongtsü asoshia India nung Khristan atemabo mashimashi achitsü mesüra bener senzütsü mesademi kümogo. Laishibaibo Khristan-tem achitsüba chiyongtsü melabatem rongnung tajungtibaji nashi shi agüja lir, saka state aika nung nashi shi achitsü aser bener senzütsüa memelar. Ibayongji, nashi bener jajar aser shi aleper aika timtem ajuruogo. Atangji, Tsüngremi achitsü melaa liaka nisungi mechidaktsünüra kecha masü, Hindu nunger mechi Khristan-temi nashi shi machitsübo aremtsüa akok, saka Yisu Khrista osang tajung sayutsüngi masübo maremtsü aser tekülem ki yanglua yangji tamangertem külemi longjemer mekülembo maremtsü. Hindu nunger yimten teloktemi India ya Hindu lima ka kümdaktsünüba aser Hindu yimsü dak alaka tanga yimsü kecha India nung mamangdaktsütsü bilemba ya India asoshi tajung masü. Iba yagi India telongjem raksatsü aser India nunger o India nunger na tamangba yimsü mechi rara tulu adoktsü. Tang Bengaluru aser UP nung Hindu nunger telok  Bajrang Dal aser Hindu Yuva Vahini teloktemi Khristan-tem sentep melidaktsütsü nokdangba aser Rashtriya Swayam Sevak Sangh (RSS) teloki India ajunga nung nashi shi mechidaktsütsüsa ozüng yanglutsü merangba mapatem ajungaji Khristan-tem asoshi tayongzükba khuret tuluka asütsü. India nung India nunger Khristan akümba purtem ya government teyari agi matong timtema alir sensakertem dang Tsüngrem tenzükertemi temeim mapa sayuba ajanga Tsüngrem temeim angateta Khristan akümba purtem lir. Ajisüaka, Hindu nungertemi item Khristan purtemji Khristan missionary-temi mesüzüka Khristan kümdaktsü ta aitsür. Iba kasa taitsüba oji shia parnoki Hindu nunger agi Khristan akümba purtem aika ano akhi Hindi yimsü dang meyipdaktsüogo. Hindu nunger teloktem jagi sensaker aser mekokmeinertema meyarir aser parnok jenjang tajungba küma meyanglutsür saka Khristan-temi anepaluba aser temeim mapa inyakbatemji tenük meremer. Item sensakertemji dang masü saka BJP government nunga yimsüsür aser kilonsertem aika Khristan school nung züngtetbatem lir, ajisüaka Khristantem nem tenüngsang agütsütsü melen Khristan-temi Tsüngrem temeim mapa inyakbaang aitsüra, Christmas aser Good Friday anogo nungang government sentong tulubaka atonga amongtsüsa latetra, ibajibo shisatsü tamajung aser ajak akoksatsüba mapa ka asütsü. Atangji, tanü India nung Khristan-tem anema Hindu teloktemi inyakba mapatem ya meimlaba mapa ka masü, anungji Khristan-temi tamang tendangba mapa amato bilema ano tamang nung tali akangshir tanüla temeshi ain nung Hindu nunger sensakertem den dang masü saka Hindu nunger takar, tulur aser yimsüsürtem danga kuli asütsüla. Iba mapa mapang nung yimten nung menden tajung ka angutsü mechi mesüra senotsü ajangzüktsü asoshi Khristan anemba telok den Khristan purtem mezüpelang masütsüla. Ken nung “Hon dang nungibo Yisu-ang shimdi,” ta atenba ama, yimten yimsüsüba menden aser alima rongsen dang nungibo Yisu temeimba meima inyaktsüba mapangji, Naga Khristan-tem asoshi tang lir.