Senti Senmang – T.Ken 147: 12-20

Tejen Lai iba maongka Israel  nunger nem agüja liasü. Iba indang ken züluri  T.Ken 147: 12-20 nung ashir. Pai Yihuda Tsüngremi parnok asoshi inyakba asoshi Pa tenüng asangtsüla ta ashi. “Kechiyong Pai ne süngküm tartangtsü, tashi itdaktsü. Pai ne chirtem ne dak moatsü” (t.13). Pai parnok artsü nung yimjung agütsü. Pai parnok mesü. Pai parnok nem Pa O aser ozüng agütsü. Pai parnok nem alinük agütsü. “Kin kecha dang Pai yamaji meinyak: aser Pa O bendangba indang, parnoki itemji metet. Nenoki Kibuba sangang” (t.20). Tsüngremi Israel nunger nem Pa senti O agütsü.

Ken züluri Tsüngrem O indang kechi ashir? Tekong 15 nung Tsüngrem ta ashir: “Alima madak Pa temelaba yoker; Pa O kanga karaa aor” (t.15). Kodang Tsüngremi jembir Pai jembiba O Pa nükjidong atalokdaktsütsü asoshi tekara osang abener ka ama aor. Tsüngremi Pa O agi alimaji azüoker. Pai ozüng agütsür aser mapatem ataloker.

Tsüngrem Oi temerang oset yimsaa odaktsür. “Pai ozüng agütsür, aser parnok yimsadaktsür” (t.18). Tsüngrem Oi temulungjang temokong aser temerang yimsadaktsür. Nai tamakoktsü tia kar ajurur asü? Tsüngrem Oi tartangtsü ajak raksatsütsü aser ne nem kechi lapoktsütsü.

Tatemsa, Tsüngrem Oi moatsür. “Pai pei O Yakob  ang … parnoki itemji memetet. Nenoki Kibuba sangang” (t.19,20). Tsüngrem Oji züngang. Ibai rongsen tulu lir, kodang ne taküm nung rizüngdir tejang atanger.

Tsüngrem O kara aor aser nükjidong ataloker. Iba yagi yimsadaktsür aser lemang lapoktsür. Aser iba yagi tagizüker ajak moatsür, iba tashi angang aser amangang. Tsüngremi anogo shia Pa O agizükdaktsünür. Nai ne taküm nung Pa O rizünger asü?