Sentsüh maora Assam mozükitem nung oxygen supply anentsü

Guwahati, October 29 (Agencies): Assam nung State Health Department-i yakta sentsüh maodokra Gorakhpur nung ita ana tajak dang atalokba kasa ataloktsü asoshi kanga ana nung lir. Ita ana tejakdang UP kübok Gorakhpur nung mozüki ka nung oxygen peria maliba ajanga tenur 60 dak tema asü, aser tang Assam nunga oxygen supply asürtemi sorkar meyong mozükitemi sen core ishika sentsüh aliba maodokra oxygen supply mesütettsü, ta metetdaktsüogo.
Director of Medical Education dangi shidi ka nung Meghalaya Oxygen Private Limited-i “September 30, 2017 tashi nung nenok sentsüh crore 3.77 aliba metetdaktsür,” ta zülutsü. Supplier tem nem sorkari küm ana tashi oset aliba sen magütsüi arudar.
“Onoki benjung, state holiday ta kecha melei anogoshia aser anonungshia kecha minprong melei oxygen gas agüja arudar. Tangbo sentsüh maoma tashibo onoki oxygen supply asütsüba tamakoktsü kümogo. Onoki November 1 nungibo oxygen gas magütsütettsü,” ta kasa shidi nung züluja lir.
State nung Guwahati Medical College and Hospital (GMCH) nung medical oxygen timtiba nüngdaker. “Anogoshia shiranger 250 shi GMCH nung oxygen agiba ajanga kümzüker, aser item rongnung 100 shibo kinü tanur lir,” ta osang ka ajanga metetdaktsü.
Kasa osang ajangasa ashiba agi, Premier Cryogenics Ltd puria Guwahati kübok sorkar meyong mozüki tem nung oxygen agütsür aser parnok nema sorkari sen crore 2.65 agütsütsüba lir, aser parnokia sorkar amokmerenogo.
Taoba küm trok tashibo oxygen agütsürtem nem itashia sen agüja liasü, iba sülen küm tesadang ka nung khen, ta agüja aruogo, saka 2016 January ita nungi tang tashi parnok nem sorkari sen agüja mali.
Osang ajangasa ashiba agi, supplier temi July ita nung joko oxygen ojangdang agütsütsü, ta sorkar amokmerena liasü. Iba sülen health ketdangser tongtitem item company tem nungi ketdangertem den senden ka aka, kong parnoki yakta sentsüh aotsüba nangzüka liasü.
“Parnoki sentsüh aotsüba nangzükaka tang tashi nung sen kecha agüja mali. Health department-i iba ken o ya kanga züba züba agir. Oxygen ya kanga dang nüngdakba oset ka lir, aser iba ya supply asü anenadokra lendong tulu ajurutsü,” ta osang ajangasa maneni metetdaktsü.
Baba Raghav Das Medical College, Gorakhpur nung tanur 60 dak tema asüba sülena state administration aser mozükitemi company temi sentsüh aotsüba atema mepishiba züba züba toktsüba kuli aika lir.