Sentsüh mechi LeEco mendenbuba indang bank account soita lir

July 04, 2017 (Agencies): China nunger technology oset yangluba company, LeEco nung mendenbuba indang bank account tem Shanghai court ajanga soita yua lir, ta osang ajanga ashi.
Jia Yueting, pa kinungtsü aser ano nisung asem meyong rongsen China nunger sen yuan billion 1.24 ($183 million) aliba ajunga shibangtsüogo.
Smartphone shishilembaba nung teyari agütsütsü asoshi bank nungi sen apuzüka aliba nung tetemlok memonoktetba ajanga Shanghai court ajanga iba obendang agütsü.
Iba ken o dak sendakba nung LeEco aser Jia Yueting nungi kicha osang sangdonga mali.
LeEco ya China indang Netfix ta nüngja agüja liasü aser iba company ajanga video aser audio stream südakja liasü aser parnok indang smartphone amala osettem yanglu tenzük.
Saka iba company ajanga smart TV, phone aser electric garitem yanglu tenzükba sülen iba company ya Apple aser Tesla company den medemdanga atu.
Taoba küm nungi US nunga LeEco ajanga oset balala ayok tenzük saka tangbo senotsü nung timtem ajurua lir aser iba ajanga oset nung sen jenjang ajemtsüsa aküm aser mapa inyaker aika anendaktsü.
Jia Yueting ya LeEco company nung chief executive mapa doktsü saka mendenbuba mapa bo bena lir aser senotsü timtem ya bilemba dang nungi tamajungba, ta pai tawa metetdaktsü.
Consumer electronic yanglur, Vizio company ya sen billion $2 agi alizüktsü asoshi sentong renema liasü saka senotsü nung timtem adokba ajanga April ita nung iba maparen athitsüsa aküm.
LeEco indang smartphone unit, Coolpad ya audit nung mangatettep aliba ajanga 2016 financial result ya thinen. Taoba küm iba company ya takoksa sen million $542 alu, ta taküm May ita nung sangdong.
LeEco indang rongsen kar court ajanga soita ayuba osang ya US nung aliba marketing firm, Beyond Media Global indang CEO, Philip G Chiu-i pelashishia agizük.
LeEco indang shishilembaba, LeTV sentsüh sen million $1 aliba ajanga Chiu-i LeEco ya court nem agütsü saka iba company ajanga tang tashi sen $100,000 agütsütsü lir, ta pai ashir.