Senzüsenbong nung timtem agütsürtem anema ken o benoktsü

Nija mozü kitem shibangra shirangertem taodak malitsü: Dimapur CMO

Dimapur, April 20 (TYO): April 20, 2020 nü Dimapur Deputy Commissioner, Anoop Kinchi IAS-i COVID 19 atema Dimapur District Task Force senden ka ayonga amen.
District administration-i aiben mepishiaka colony/village aika nung COVID-19 anema inyakertem aser tongtipang nüngdak belenertem senzüsenbongba noktangba aser timtem agütsüba atema tebilemtsü abener, ta tanü senden nung DC Anoop-i ashi.
COVID-19 anema inyakertem senzüsenbongba nung timtem mesüra tetsükdaktsü agütsürtem anema ken o benoktsü aser ozung tapet agi merenshitsü, ta Dimapur DC-i tekümdangtsü ka metetdaktsü.
Iba ama tensa ka nung telok balalai tongtipang shilem agitsüla. NGOs, GBs/village councils-i pei pei telongtet nung osang tejangja sangdongtsüla. Colony/village nung telok telok adenshir nüka mitba dang nungibo, nisung o nisung tsüngda tepila ayutsü atema pei pei kidang ang amongtsüla aser lendong nungi jenbua alitsü, ta Anoop Kinchi-isa ashi.
Senden nung CMO aser MS Dimapur-ia medical mapa inyakertem senzüsenbongtsü noktangba atema tebilemtsü abenba lemsatep.
“Dimapur district Hospital ya COVID-19 hospital ka kümogo, anungji shirangertemi nija mozü kitemi aotsüsa akümer. Ajisüaka, nija mozü kitem lapoka inyaksangshia aotsüba nung timtem ajurur, kechiyong colony/village ketdangsertemi medical mapa inyakertema dena mesenzükdaktsüi noktanger.
Yamai dang ao nungbo nija mozü kitem shibangtsüsa akümtsü aser shirangertem taodak malitsü” ta Dimapur CMO-isa ashi.
COVID 19 ya tashidak tasen ka lir aser iba dak sendakba osang tejangja metetdaktsütsüla, kechiyong nübortemi iba tashidak agi asürtem mang aremtsü atemaa tebilemtsü abener, ta senden nung adenertemi bilemba lemsatep.
Idangji Dimapur CMO-i ashiba agi, “COVID-19 agi shiranga asüba mangji Medical team-i mozü agi shidokba sülen kinungertemi aremtsü atema bener aotsü akok.”
“Tasümang amshiba nung tenokdangba ka lir aser ibaji kinungertemi mang nungji mekongshitsüba lir. Tasümang aremtsü indang inyakyim lateta aliba ajak inyakra, shisabulutsü nüngdak madoker” ta paisa metetdaktsü.
Senden nungsa tang teinyakdak wholesale maparen maneni inyaka atatsü lemtet.
“Dimapur COVID 19 Hospital nung shirangertem anioka anepalutsü atema kanga junga renema lir. Nisung ajaki yaritepba ajanga asenoki COVID 19 madak takok angutsü” Dimapur DC Anoop-isa metetdaktsü.