Seoul nung 10 buba Trilateral Economic & Trade Ministers’ senden amen

Seoul, October 30 (Agencies): Japan, China aser South Korea nungi Trade Minister-temi 10 buba Trilateral Economic & Trade Ministers’ senden S Korea yimtiba, Seoul nung tanü Hokolbar nü menogo.

Linük asem lenirtemi tan Deobar nü senden amenba jakdang S Korea’er Trade, Industry & Energy Minister, Yoon San-jick; Japan’er Economy, Trade & Industry Minister, Motoo Hayashi aser China International Trade Representative, Zhong Shan nungeri tanü sendenji amener lir.

Par linük asem tsüngda tetsükdakba kecha melii shishilembateptsü tezüngzüktep agitsü nükjidong nung tan senden amenba ya par linük asemi küm 3 ser tasadang ka shi iba amala senden memeni arur külen tan mezüng amener lir.

“Asia nung terenlok lidaktsütsü asoshi Asia nung tentetba tongti linüktemi shishilembatsü sabang nung tongti shilem agitsüla. Aji oda, ozü China den külemi, S Korea aser Japan rong nung rongensen tesendaktep tajung aliba ajanga Asia dang masü saka alima ajunga nem tajangzük aser terenlok bener arutsütsü,” ta Zhong-i tanü senden tembangba sülen metetdaktsü.

Beijing, Tokyo aser Seoul nungi tongti shishilembatsü lenirtemi tetsükdakba kecha melii shishilembatsü tezüngzüktep agiba den külemi, Asia ajunga nung tetsükdakba kecha melii shishilembatsüren, Regional Comprehensive Economic Partnership (RCEP) mapatong takok ngua inyaktsü onüka benokba osang jangjaogo.

Asia nung tentetba linük 16 densemba RCEP mapatong mapa küma inyaktsü onük 2013 küm nungi tenzüka benok saka iba mapatongji takok ngua meinyakteti tang oda anendaka lir.

“Asia densema alima ajunga nung rongsenren terenlok lidaktsütsü nükjidong nung ozü linük asemi shishilembatsüren amalitepa inyaktsü nangzüktepogo,” ta Hayashi-ia metetdaktsü.